barbaad-e-arzu ko diwana kah diya hai

barbād-e-ārzū ko dīvāna kah diyā hai

ik lafz kah ke tum ne afsāna kah diyā hai

the jin ko naaz vo bhī mushkil meñ paḌ ga.e haiñ

sab ko tirī nazar ne begāna kah diyā hai

maiñ nāzish-e-junūñ se dīvāna ho gayā huuñ

jab us ne tañg aakar dīvāna kah diyā hai

āzād-e-do-jahāñ huuñ haañ tum burā na maano

maiñ ne to ek fiqra-e-rindāna kah diyā hai

āñkhoñ ne terī kī hai go rahzanī hī lekin

ḳhātir se terī dil ko nazrāna kah diyā hai

'maikash' hai aur tark-e-jām-o-subū ki āḳhir

āñkhoñ ne terī rāz-e-mai-kHāna kah diyā hai

barbaad-e-arzu ko diwana kah diya hai

ek lafz kah ke tum ne afsana kah diya hai

the jin ko naz wo bhi mushkil mein paD gae hain

sab ko teri nazar ne begana kah diya hai

main nazish-e-junun se diwana ho gaya hun

jab us ne tang aakar diwana kah diya hai

aazad-e-do-jahan hun han tum bura na mano

main ne to ek fiqra-e-rindana kah diya hai

aankhon ne teri ki hai go rahzani hi lekin

KHatir se teri dil ko nazrana kah diya hai

'maikash' hai aur tark-e-jam-o-subu ki aaKHir

aankhon ne teri raaz-e-mai-kHana kah diya hai