kya sitam hai jaan di jin ke liye

kyā sitam hai jaan dī jin ke liye

vo ye pūchheñ mar miTe kin ke liye

shab ko thoḌī shaiḳh ne pī daur meñ

aur thoḌī le ga.e din ke liye

jā.eñge jaanā hai ham ko ek roz

aa.e haiñ duniyā meñ do din ke liye

dur dame detā hai saaqī chheḌ se

shaiḳh jaise saaf bātin ke liye

taak meñ un kī abhī se barq hai

phirtī hai bulbul magar tan ke liye

kam nahīñ tūfān se 'ahd-e-shabāb

haaye sab zebā hai us sin ke liye

ḳhāna-e-dil meñ mile vo jalva-gar

dar-ba-dar bhaTkā kiye jin ke liye

dil ko bhī dhaḌkā thā hijr-e-yār kā

ham bhī rote the usī din ke liye

vā’da-e-dīdār-e-mahshar yaad hai

ab uThā rakhoge kis din ke liye

yuuñ to bālīñ par haiñ 'bāsit' saiñkaḌoñ

vo na aa.e jaan dī jin ke liye

kya sitam hai jaan di jin ke liye

wo ye puchhen mar miTe kin ke liye

shab ko thoDi shaiKH ne pi daur mein

aur thoDi le gae din ke liye

jaenge jaana hai hum ko ek roz

aae hain duniya mein do din ke liye

dur dame deta hai saqi chheD se

shaiKH jaise saf baatin ke liye

tak mein un ki abhi se barq hai

phirti hai bulbul magar tan ke liye

kam nahin tufan se 'ahd-e-shabab

haye sab zeba hai us sin ke liye

KHana-e-dil mein mile wo jalwa-gar

dar-ba-dar bhaTka kiye jin ke liye

dil ko bhi dhaDka tha hijr-e-yar ka

hum bhi rote the usi din ke liye

wa’da-e-didar-e-mahshar yaad hai

ab uTha rakhoge kis din ke liye

yun to baalin par hain 'basit' sainkaDon

wo na aae jaan di jin ke liye