be-ruKHi unki har ada mein hai

be-ruḳhī un kī har adā meñ hai

dil ḳhudā jaane kis havā meñ hai

ik jhalak us kī ibtidā meñ hai

āzmā.ish jo intihā meñ hai

zohd meñ hai na ittiqā meñ hai

zindagī mo'tabar vafā meñ hai

qisse auroñ ke sun rahā hai koī

dāstāñ merī iltavā meñ hai

ḳhair yā rab mire nasheman kī

barq-e-betāb phir ghaTā meñ hai

zulf kī chīra-dastiyā to

aadmī panja-e-balā meñ hai

jis taraf chāhe us kā ruḳh phere

naav ab dast-e-nāḳhudā meñ hai

vo ġhurūr-e-jamāl meñ gum haiñ

mudda.ī arz-e-mudda.ā meñ hai

raas aayā na jāma-e-hastī

aadmī tañg-sī qabā meñ hai

aur kuchh ho 'nasīr' meñ ki na ho

sair-chashmī tire gadā meñ hai

be-ruKHi un ki har ada mein hai

dil KHuda jaane kis hawa mein hai

ek jhalak us ki ibtida mein hai

aazmaish jo intiha mein hai

zohd mein hai na ittiqa mein hai

zindagi mo'tabar wafa mein hai

qisse auron ke sun raha hai koi

dastan meri iltawa mein hai

KHair ya rab mere nasheman ki

barq-e-betab phir ghaTa mein hai

zulf ki chira-dastiya to

aadmi panja-e-bala mein hai

jis taraf chahe us ka ruKH phere

naw ab dast-e-naKHuda mein hai

wo ghurur-e-jamal mein gum hain

muddai arz-e-muddaa mein hai

ras aaya na jama-e-hasti

aadmi tang-si qaba mein hai

aur kuchh ho 'nasir' mein ki na ho

sair-chashmi tere gada mein hai