sine mein dil hai dil mein dagh dagh mein soz-o-saz-e-ishq

siine meñ dil hai dil meñ daaġh daaġh meñ soz-o-sāz-e-ishq

parda-ba-parda hai nihāñ parda-nashīñ kā rāz-e-ishq

naaz kabhī niyāz hai aur niyāz nāz-e-ishq

ḳhatm huā na ho kabhī silsila-e-darāz-e-ishq

ishq adā-navāz-e-husn husn karishma-sāz-e-ishq

aaj se kyā azal se hai husn se sāz-bāz-e-ishq

apnī ḳhabar kahāñ unheñ jin pe khulā hai rāz-e-ishq

saare shu.ūr miT ga.e jab huā imtiyāz-e-ishq

hosh-o-ḳhirad bhī al-firāqo-bainī-va-bainaka kaheñ

hazrat-e-dil kā ḳhair se hai safar-e-hijāz-e-ishq

pīr-e-muġhāñ ke pā-e-nāz aur mirā sar-e-niyāz

hotī hai mai-kade meñ rose apnī yūñhī namāz-e-ishq

hasrat-o-yās-o-ārzū shauq kā iqtidā kareñ

kushta-e-ġham kī laash par dhuum se ho namāz-e-ishq

ishq kī zaat hī se hai ḳhūbī-e-husn-o-shān-e-husn

husn ke dam-qadam se hai saarā ye soz-o-sāz-e-ishq

ai dil-e-dardmand phir naala ho koī dil-gudāz

suunī paḌī hai bazm-e-shauq chheḌ de apnā sāz-e-ishq

hosh-o-ḳhirad adū-e-ishq ishq hai dushman-e-ḳhirad

hai na huā na ho kabhī aql se sāz-bāz-e-ishq

'bedam'-e-ḳhasta hai kahāñ asl meñ koī aur hai

zamzama-sanj be-ḳhudī naġhma-tarāz sāz-e-ishq

sine mein dil hai dil mein dagh dagh mein soz-o-saz-e-ishq

parda-ba-parda hai nihan parda-nashin ka raaz-e-ishq

naz kabhī niyaz hai aur niyaz naz-e-ishq

KHatm hua na ho kabhī silsila-e-daraaz-e-ishq

ishq ada-nawaz-e-husn husn karishma-saz-e-ishq

aaj se kya azal se hai husn se saz-baz-e-ishq

apni KHabar kahan unhen jin pe khula hai raaz-e-ishq

sare shuur miT gae jab hua imtiyaz-e-ishq

hosh-o-KHirad bhi al-firaqo-baini-wa-bainaka kahen

hazrat-e-dil ka KHair se hai safar-e-hijaz-e-ishq

pir-e-mughan ke pa-e-naz aur mera sar-e-niyaz

hoti hai mai-kade mein rose apni yunhi namaz-e-ishq

hasrat-o-yas-o-arzu shauq ka iqtida karen

kushta-e-gham ki lash par dhum se ho namaz-e-ishq

ishq ki zat hi se hai KHubi-e-husn-o-shan-e-husn

husn ke dam-qadam se hai sara ye soz-o-saz-e-ishq

ai dil-e-dardmand phir nala ho koi dil-gudaz

suni paDi hai bazm-e-shauq chheD de apna saz-e-ishq

hosh-o-KHirad adu-e-ishq ishq hai dushman-e-KHirad

hai na hua na ho kabhī aql se saz-baz-e-ishq

'bedam'-e-KHasta hai kahan asl mein koi aur hai

zamzama-sanj be-KHudi naghma-taraaz saz-e-ishq