qasr-e-jaanan tak rasai ho kisi tadbir se

qasr-e-jānāñ tak rasā.ī ho kisī tadbīr se

tā.ir-e-jāñ ke liye par maañg luuñ maiñ tiir se

un ko kyā dhoka huā mujh nā-tavāñ ko dekh

merī sūrat kyuuñ milāte haiñ mirī tasvīr se

gāliyāñ de kar ba-jā-e-qum ke ai rashk-e-masīh

aap ne murde jilā.e haiñ na.ī tadbīr se

sadqe ai qātil tire mujh tishna-e-dīdār kī

tishnagī jaatī rahī āb-e-dam-e-shamshīr se

ishve se ġhamze se shoḳhī se adā se naaz se

miTne vaalā huuñ miTā diije kisī tadbīr se

ik savāl-e-vasl par do do sazā.eñ diiñ mujhe

teġh se kaaTā zabāñ ko sī diye lab tiir se

kuchh na ho ai inqilāb-e-āsmāñ itnā to ho

ġhair kī qismat badal jaa.e merī taqdīr se

zindagī se kyuuñ na ho nafrat ki mahv-e-zulf huuñ

qaid-e-hastī mujh ko 'bedam' kam nahīñ zanjīr se

qasr-e-jaanan tak rasai ho kisi tadbir se

tair-e-jaan ke liye par mang lun main tir se

un ko kya dhoka hua mujh na-tawan ko dekh

meri surat kyun milate hain meri taswir se

galiyan de kar ba-ja-e-qum ke ai rashk-e-masih

aap ne murde jilae hain nai tadbir se

sadqe ai qatil tere mujh tishna-e-didar ki

tishnagi jati rahi aab-e-dam-e-shamshir se

ishwe se ghamze se shoKHi se ada se naz se

miTne wala hun miTa dije kisi tadbir se

ek sawal-e-wasl par do do sazaen din mujhe

tegh se kaTa zaban ko si diye lab tir se

kuchh na ho ai inqilab-e-asman itna to ho

ghair ki qismat badal jae meri taqdir se

zindagi se kyun na ho nafrat ki mahw-e-zulf hun

qaid-e-hasti mujh ko 'bedam' kam nahin zanjir se