khinchi hai tasawwur mein taswir-e-ham-aghoshi

khīñchī hai tasavvur meñ tasvīr-e-ham-āġhoshī

ab hosh na aane de mujh ko mirī be-hoshī

pā jaanā hai kho jaanā kho jaanā hai pā jaanā

be-hoshī hai hushyārī hushyārī hai be-hoshī

maiñ sāz-e-haqīqat huuñ dam-sāz-e-haqīqat huuñ

ḳhāmoshī hai goyā.ī goyā.ī hai ḳhāmoshī

asrār-e-mohabbat kā iz.hār hai nā-mumkin

TuuTā hai na TūTegā qufl-e-dar-e-ḳhāmoshī

har dil meñ tajallī hai un ke ruḳh-e-raushan kī

ḳhurshīd se hāsil hai zarroñ ko ham-āġhoshī

jo suntā huuñ suntā huuñ maiñ apnī ḳhamoshī se

jo kahtī hai kahtī hai mujh se mirī ḳhāmoshī

ye husn-faroshī kī dūkān hai yā chilman

nazzāra kā nazzāra rūposhī kī rūposhī

yaañ ḳhaak kā zarra bhī laġhzish se nahīñ ḳhālī

mai-ḳhāna-e-duniyā hai yā ’ālam-e-be-hoshī

haañ haañ mire ‘isyāñ kā parda nahīñ khulne kā

haañ haañ tirī rahmat kā hai kaam ḳhatā-poshī

is parde meñ poshīda lailā-e-do-’ālam hai

be-vaj.h nahīñ 'bedam' ka’abe kī siyah-poshī

khinchi hai tasawwur mein taswir-e-ham-aghoshi

ab hosh na aane de mujh ko meri be-hoshi

pa jaana hai kho jaana kho jaana hai pa jaana

be-hoshi hai hushyari hushyari hai be-hoshi

main saz-e-haqiqat hun dam-saz-e-haqiqat hun

KHamoshi hai goyai goyai hai KHamoshi

asrar-e-mohabbat ka izhaar hai na-mumkin

TuTa hai na TuTega qufl-e-dar-e-KHamoshi

har dil mein tajalli hai un ke ruKH-e-raushan ki

KHurshid se hasil hai zarron ko ham-aghoshi

jo sunta hun sunta hun main apni KHamoshi se

jo kahti hai kahti hai mujh se meri KHamoshi

ye husn-faroshi ki dukan hai ya chilman

nazzara ka nazzara ruposhi ki ruposhi

yan KHak ka zarra bhi laghzish se nahin KHali

mai-KHana-e-duniya hai ya ’alam-e-be-hoshi

han han mere ‘isyan ka parda nahin khulne ka

han han teri rahmat ka hai kaam KHata-poshi

is parde mein poshida laila-e-do-’alam hai

be-wajh nahin 'bedam' ka’abe ki siyah-poshi