jis ko dekha yar tera aashiq-e-na-dida hai

jis ko dekhā yaar terā āshiq-e-nā-dīda hai

mujh pe kyā mauqūf ik a.alam terā girvīda hai

mubtalā hai dil to jān-e-nā-tavāñ girvīda hai

dīda-e-dīdār jo tere liye nam-dīda hai

apnī hastī kī ḳhabar le mardum-e-dīda na ban

dūsroñ ko dekhtā hai aap se nā-dīda hai

dil hai kyā vo dil ki jis dil meñ na ho ulfat tirī

vah bhī kyā diida jo terī diid se nā-dīda hai

be-hijābī ye ki har zarra meñ hai jalva-garī

phir hijāb aisā ki apne aap se poshīda hai

āshiq-e-nākām jalva meñ bhī hai hirmāñ-nasīb

jis ko diida samjhā hai ai dil vahī nā-dīda hai

muntazir hai aap ke jalve kī nargis baaġh meñ

gul garebāñ-chāk shabnam ik taraf nam-dīda hai

ruuh se har dam ye rahtā hai taqāzā-e-rasūl

ab utāro yah qabā-e-'unsurī bosīda hai

dekh kar mujh ko pashemāñ hañs ke rahmat ne kahā

kaun sā vah jurm hai 'bedam' jo nā-bakHshīda hai

jis ko dekha yar tera aashiq-e-na-dida hai

mujh pe kya mauquf ek aalam tera girwida hai

mubtala hai dil to jaan-e-na-tawan girwida hai

dida-e-didar jo tere liye nam-dida hai

apni hasti ki KHabar le mardum-e-dida na ban

dusron ko dekhta hai aap se na-dida hai

dil hai kya wo dil ki jis dil mein na ho ulfat teri

wah bhi kya dida jo teri did se na-dida hai

be-hijabi ye ki har zarra mein hai jalwa-gari

phir hijab aisa ki apne aap se poshida hai

aashiq-e-nakaam jalwa mein bhi hai hirman-nasib

jis ko dida samjha hai ai dil wahi na-dida hai

muntazir hai aap ke jalwe ki nargis bagh mein

gul gareban-chaak shabnam ek taraf nam-dida hai

ruh se har dam ye rahta hai taqaza-e-rasul

ab utaro yah qaba-e-'unsuri bosida hai

dekh kar mujh ko pasheman hans ke rahmat ne kaha

kaun sa wah jurm hai 'bedam' jo na-bakHshida hai