kalisa mein ho kaba mein ho but-KHane ke andar ho

kalīsā meñ ho ka.aba meñ ho but-ḳhāne ke andar ho

ġharaz ye hai kahīñ ho un kā nazzāra mayassar ho

bas ab us ko na pūchho rahne do kyā kyā ho kyuuñ kar ho

kaTārī ho chhurī ho tiir ho nashtar ho ḳhanjar ho

mirā sar un kī chaukhaT un kī chaukhaT ho mirā sar ho

agar qismat meñ chakkar hai to us rauza kā chakkar ho

qiyāmat meñ jo yā-rab tābish-e-ḳhurshed-e-mahshar ho

to sar par chatar ban kar sāya-e-dāmān-e-haidar ho

vo aa.eñ jabki mushtāq thā aape se bāhar ho

ye kyā milnā ki jab milnā na milne ke barābar ho

shahanshāh-e-hasīnāñ ho parī-zādoñ ke afsar ho

koī behtar hai a.alam meñ to tum behtar se behtar ho

bas is meñ shak nahīñ 'āshiq-navāzī ḳhatm tum par

ḳhudā rakhe tumheñ tum āftāb-e-zarra-parvāna ho

ye hasrat hai ki 'bedam' zindagī ho yā mirā marnā

jo kuchh honā hai ab to kūcha-e-jānāñ meñ chal kar ho

kalisa mein ho kaba mein ho but-KHane ke andar ho

gharaz ye hai kahin ho un ka nazzara mayassar ho

bas ab us ko na puchho rahne do kya kya ho kyun kar ho

kaTari ho chhuri ho tir ho nashtar ho KHanjar ho

mera sar un ki chaukhaT un ki chaukhaT ho mera sar ho

agar qismat mein chakkar hai to us rauza ka chakkar ho

qiyamat mein jo ya-rab tabish-e-KHurshed-e-mahshar ho

to sar par chatar ban kar saya-e-daman-e-haidar ho

wo aaen jabki mushtaq tha aape se bahar ho

ye kya milna ki jab milna na milne ke barabar ho

shahanshah-e-hasinan ho pari-zadon ke afsar ho

koi behtar hai aalam mein to tum behtar se behtar ho

bas is mein shak nahin 'ashiq-nawazi KHatm tum par

KHuda rakhe tumhein tum aaftab-e-zarra-parwana ho

ye hasrat hai ki 'bedam' zindagi ho ya mera marna

jo kuchh hona hai ab to kucha-e-jaanan mein chal kar ho