na jaane meri lahad par kahan se aate hain

na jaane merī lahad par kahāñ se aate haiñ

ki jab vo aate haiñ dāman-kashāñ se aate haiñ

qasam ḳhudā kī ham us āstāñ se aate haiñ

nazar ḳhudā.ī ke jalve jahāñ se aate haiñ

hamāre ba.ad huī ḳhatm garm-bāzārī

vo aaj yūsuf be kārvāñ se aate haiñ

hazār marham-e-nāsūr dil fidā un par

ḳhadañg-e-nāz jo terī kamāñ se aate haiñ

vo bāda-nosh bhī phirte haiñ tishna kaam kahīñ

lagā ke aas jo pīr-e-muġhāñ se aate haiñ

khulī hai jin pe haqīqat quyūd-e-hastī kī

qafas bhī un ko nazar āshiyāñ se aate haiñ

zamāna bhar meñ Thikāna kahīñ nahīñ un kā

jo yaar uTh ke tire āstāñ se aate haiñ

na saḳht jānoñ pe jauhar khileñ huzūr us ke

jabīn-e-teġh pe bil-imtehāñ se aate haiñ

ye kū-e-mai-kada ai shaiḳh aur ye rīsh-e-darāz

kahāñ kā azm hai hazrat kahāñ se aate haiñ

kahīñ ye ḳhauf ki palToge kab talak 'bedam'

ga.e to zinda ham us āstāñ se aate haiñ

na jaane meri lahad par kahan se aate hain

ki jab wo aate hain daman-kashan se aate hain

qasam KHuda ki hum us aastan se aate hain

nazar KHudai ke jalwe jahan se aate hain

hamare baad hui KHatm garm-bazari

wo aaj yusuf be karwan se aate hain

hazar marham-e-nasur dil fida un par

KHadang-e-naz jo teri kaman se aate hain

wo baada-nosh bhi phirte hain tishna kaam kahin

laga ke aas jo pir-e-mughan se aate hain

khuli hai jin pe haqiqat quyud-e-hasti ki

qafas bhi un ko nazar aashiyan se aate hain

zamana bhar mein Thikana kahin nahin un ka

jo yar uTh ke tere aastan se aate hain

na saKHt jaanon pe jauhar khilen huzur us ke

jabin-e-tegh pe bil-imtehan se aate hain

ye ku-e-mai-kada ai shaiKH aur ye rish-e-daraaz

kahan ka azm hai hazrat kahan se aate hain

kahin ye KHauf ki palToge kab talak 'bedam'

gae to zinda hum us aastan se aate hain