نہ جانے میری لحد پر کہاں سے آتے ہیں

نہ جانے میری لحد پر کہاں سے آتے ہیں

کہ جب وہ آتے ہیں دامن کشاں سے آتے ہیں

قسم خدا کی ہم اس آستاں سے آتے ہیں

نظر خدائی کے جلوے جہاں سے آتے ہیں

ہمارے بعد ہوئی ختم گرم بازاری

وہ آج یوسف بے کارواں سے آتے ہیں

ہزار مرہم ناصور دل فدا ان پر

خدنگ ناز جو تیری کماں سے آتے ہیں

وہ بادہ نوش بھی پھرتے ہیں تشنہ کام کہیں

لگا کے آس جو پیر مغاں سے آتے ہیں

کھلی ہے جن پہ حقیقت قیود ہستی کی

قفس بھی ان کو نظر آشیاں سے آتے ہیں

زمانہ بھر میں ٹھکانہ کہیں نہیں ان کا

جو یار اٹھ کے ترے آستاں سے آتے ہیں

نہ سخت جانوں پہ جوہر کھلیں حضور اس کے

جبین تیغ پہ بل امتحاں سے آتے ہیں

یہ کوئے میکدہ اے شیخ اور یہ ریش دراز

کہاں کا عزم ہے حضرت کہاں سے آتے ہیں

کہیں یہ خوف کہ پلٹو گے کب تلک بیدمؔ

گئے تو زندہ ہم اس آستاں سے آتے ہیں