qasr-e-jaanan tak rasai ho kisi tadbir se

qasr-e-jānāñ tak rasā.ī ho kisī tadbīr se

tā.ir-e-jān ke liye par maañg luuñ maiñ tiir se

un ko kyā dhokā huā mujh nā-tavāñ ko dekh kar

merī sūrat kyuuñ milāte haiñ mirī tasvīr se

gāliyāñ de kar bajā.e qum ke ai rashk-e-masīh

aap ne mere jalā.e haiñ na.ī tadbīr se

sadqe ai qātil āb-e-dam-e-shamshīr se

tishnagī jaatī rahī āb-e-dam-e-shamshīr se

kuchh na ho ai inqalāb-e-āsmān itnā to ho

ġhair kī qismat badal jaaye mirī taqdīr se

zindagī se kyuuñ na ho nafrat ke mahv zulf huuñ

qaid-e-hastī mujh ko 'bedam' kam nahīñ zanjīr se

qasr-e-jaanan tak rasai ho kisi tadbir se

tair-e-jaan ke liye par mang lun main tir se

un ko kya dhoka hua mujh na-tawan ko dekh kar

meri surat kyun milate hain meri taswir se

galiyan de kar bajae qum ke ai rashk-e-masih

aap ne mere jalae hain nai tadbir se

sadqe ai qatil aab-e-dam-e-shamshir se

tishnagi jati rahi aab-e-dam-e-shamshir se

kuchh na ho ai inqalab-e-asman itna to ho

ghair ki qismat badal jaye meri taqdir se

zindagi se kyun na ho nafrat ke mahw zulf hun

qaid-e-hasti mujh ko 'bedam' kam nahin zanjir se