mera dil us pe nazan hai ki dil hun par main wo dil hun

mirā dil us pe nāzāñ hai ki dil huuñ par maiñ vo dil huuñ

zamāna jis kā majnūñ hai maiñ us lailā kā mahmil huuñ

taḌapnā bhī na aayā ho jise vo murġh-e-bismil huuñ

jo apnī hī lagī meñ jal bujhe vo sham.a-e-mahfil huuñ

sabā mere tan-e-kāhīda ko to hī uḌā le chal

ki dūr-uftāda huuñ darmāñda huuñ gum-karda manzil huuñ

muqir hai dil ki vo aa.eñ to mujh meñ kyā kareñ ā-kar

sarāpā ġham-kade kī shakl huuñ andoh manzil huuñ

mirā ḳhuuñ bhī vo jaadū hai ki sar par chaḌh ke bolegā

sar-e-mahshar pukār uTThoge tum maiñ terā qātil huuñ

liye baiThā huuñ maiñ apnā dil sad-pāra mahfil meñ

koī ik dil se shāmil ho to maiñ sau dil se shāmil huuñ

ḳhudā rakhe mirī sustī kā zāhid kyā Thikānā hai

yahāñ tak be-ḳhudī hai apnī hastī se bhī ġhāfil huuñ

maiñ āvāz-e-jaras huuñ ham-nashīñ yā nighat-e-gul huuñ

ki sab se duur bhī huuñ aur maiñ phir sab meñ shāmil huuñ

nahīñ ma.alūm kyā kah kar chhurī pherī thī gurdoñ par

ki shah-e-rag se sadā aatī hai maiñ mamnūn qātil huuñ

sitam par naaz hai un ko mujhe zabt-o-tahammul par

jafāon meñ vo yaktā maiñ vafādārī meñ kāmil huuñ

unheñ mahfil se kyuuñ mere nikalvāne kī koshish hai

nasīb-e-dushmanāñ kyā ġhair kī maiñ hasrat-e-dil huuñ

vo āsāñ huuñ ki āsānī se har mushkil meñ phañs jā۔ūñ

na āsānī se jo āsāñ ho vo dushvār mushkil huuñ

na dil is zulf meñ phañstā na ye mujh par balā aatī

usī kam-baḳht ke hāthoñ meñ pāband-e-salāsil huuñ

shikāyat un se jab karatā huuñ apnī be-qarārī kī

to kahte haiñ ki kyā maiñ bā.is-e-betābī-e-dil huuñ

gulistān-e-jahāñ meñ nighat-e-gul kī tarah 'bedam'

judā bhī huuñ usī majma.a se jis majma.a meñ shāmil huuñ

mere sar par hai 'bedam' sāyā-e-mahbūb-e-subhānī

ġhulām-e-qādarī huuñ maiñ murīd-e-shaikh-e-kāmil huuñ

mera dil us pe nazan hai ki dil hun par main wo dil hun

zamana jis ka majnun hai main us laila ka mahmil hun

taDapna bhi na aaya ho jise wo murgh-e-bismil hun

jo apni hi lagi mein jal bujhe wo shama-e-mahfil hun

saba mere tan-e-kahida ko to hi uDa le chal

ki dur-uftada hun darmanda hun gum-karda manzil hun

muqir hai dil ki wo aaen to mujh mein kya karen aa-kar

sarapa gham-kade ki shakl hun andoh manzil hun

mera KHun bhi wo jadu hai ki sar par chaDh ke bolega

sar-e-mahshar pukar uTThoge tum main tera qatil hun

liye baiTha hun main apna dil sad-para mahfil mein

koi ek dil se shamil ho to main sau dil se shamil hun

KHuda rakhe meri susti ka zahid kya Thikana hai

yahan tak be-KHudi hai apni hasti se bhi ghafil hun

main aawaz-e-jaras hun ham-nashin ya nighat-e-gul hun

ki sab se dur bhi hun aur main phir sab mein shamil hun

nahin malum kya kah kar chhuri pheri thi gurdon par

ki shah-e-rag se sada aati hai main mamnun qatil hun

sitam par naz hai un ko mujhe zabt-o-tahammul par

jafaon mein wo yakta main wafadari mein kaamil hun

unhen mahfil se kyun mere nikalwane ki koshish hai

nasib-e-dushmanan kya ghair ki main hasrat-e-dil hun

wo aasan hun ki aasani se har mushkil mein phans ja۔un

na aasani se jo aasan ho wo dushwar mushkil hun

na dil is zulf mein phansta na ye mujh par bala aati

usi kam-baKHt ke hathon mein paband-e-salasil hun

shikayat un se jab karata hun apni be-qarari ki

to kahte hain ki kya main bais-e-betabi-e-dil hun

gulistan-e-jahan mein nighat-e-gul ki tarah 'bedam'

juda bhi hun usi majma se jis majma mein shamil hun

mere sar par hai 'bedam' saya-e-mahbub-e-subhani

ghulam-e-qadari hun main murid-e-shaikh-e-kaamil hun