ishq ne husn ka nikhaar kiya

ishq ne husn kā nikhār kiyā

tere jalvoñ ko āshkār kiyā

hai merī shām-e-ġham udaas to ho

tum ne kyuuñ dil ko sogvār kiyā

baḳhshishoñ ne mujhe navāzā hai

rahmatoñ ne gunāhgār kiyā

dāman-e-dil meñ jo bhī gul aayā

jaan rañgīnī-e-bahār kiyā

dil ne lākhoñ fareb khaa.e haiñ

phir bhī us be-vafā ko pyaar kiyā

kis kā shikvā karūñ maiñ ai 'bedār'

ḳhud mirī aarzū ne ḳhvār kiyā

ishq ne husn ka nikhaar kiya

tere jalwon ko aashkar kiya

hai meri sham-e-gham udas to ho

tum ne kyun dil ko sogwar kiya

baKHshishon ne mujhe nawaza hai

rahmaton ne gunahgar kiya

daman-e-dil mein jo bhi gul aaya

jaan rangini-e-bahaar kiya

dil ne lakhon fareb khae hain

phir bhi us be-wafa ko pyar kiya

kis ka shikwa karun main ai 'bedar'

KHud meri aarzu ne KHwar kiya