meri aankhon se wo aaine mein surat dekhte

merī āñkhoñ se vo ā.īne meñ sūrat dekhte

phir sambhal kar apnī hālat merī hālat dekhte

un ke dar par naqsh-bar-dīvār hote kaash ham

āte-jāte log ik tasvīr-e-hasrat dekhte

kyā ḳhabar kyā guzrī ham par jalva-gāh-e-nāz meñ

ham vo jalve dekhte yā apnī hālat dekhte

dekhne vāloñ kī āñkhoñ meñ samā.ī jo vo shakl

log phir un dekhne vāloñ kī sūrat dekhte

be-nishānī ne bhulāyā haaye un ke dil se bhī

yaad to karte mujhe jab mirī turbat dekhte

dekh to lete haiñ vo ham se ġharīboñ kī taraf

ye bhī hai ai dil bahut duniyā kī hālat dekhte

diid se allāh vāloñ kī thī nafrat kyā zarūr

us sanam ko dekhte aur us kī qudrat dekhte

hotī haiñ ġhusse meñ chaar āñkheñ to un se 'benazīr'

varna vo āñkheñ dikhāte aur hazrat dekhte

meri aankhon se wo aaine mein surat dekhte

phir sambhal kar apni haalat meri haalat dekhte

un ke dar par naqsh-bar-diwar hote kash hum

aate-jate log ek taswir-e-hasrat dekhte

kya KHabar kya guzri hum par jalwa-gah-e-naz mein

hum wo jalwe dekhte ya apni haalat dekhte

dekhne walon ki aankhon mein samai jo wo shakl

log phir un dekhne walon ki surat dekhte

be-nishani ne bhulaya haye un ke dil se bhi

yaad to karte mujhe jab meri turbat dekhte

dekh to lete hain wo hum se gharibon ki taraf

ye bhi hai ai dil bahut duniya ki haalat dekhte

did se allah walon ki thi nafrat kya zarur

us sanam ko dekhte aur us ki qudrat dekhte

hoti hain ghusse mein chaar aankhen to un se 'benazir'

warna wo aankhen dikhate aur hazrat dekhte