میری آنکھوں سے وہ آئینے میں صورت دیکھتے

میری آنکھوں سے وہ آئینے میں صورت دیکھتے

پھر سنبھل کر اپنی حالت میری حالت دیکھتے

ان کے در پر نقش بر دیوار ہوتے کاش ہم

آتے جاتے لوگ اک تصویر حسرت دیکھتے

کیا خبر کیا گزری ہم پر جلوہ گاہ ناز میں

ہم وہ جلوے دیکھتے یا اپنی حالت دیکھتے

دیکھنے والوں کی آنکھوں میں سمائی جو وہ شکل

لوگ پھر ان دیکھنے والوں کی صورت دیکھتے

بے نشانی نے بھلایا ہائے ان کے دل سے بھی

یاد تو کرتے مجھے جب مری تربت دیکھتے

دیکھ تو لیتے ہیں وہ ہم سے غریبوں کی طرف

یہ بھی ہے اے دل بہت دنیا کی حالت دیکھتے

دید سے اللہ والوں کی تھی نفرت کیا ضرور

اس صنم کو دیکھتے اور اس کی قدرت دیکھتے

ہوتی ہیں غصے میں چار آنکھیں تو ان سے بے نظیرؔ

ورنہ وہ آنکھیں دکھاتے اور حضرت دیکھتے