tere gham ne ye din dikhaya mujhe

tere ġham ne ye din dikhāyā mujhe

ki mujh se hī āḳhir chhuḌāyā mujhe

huā apnī hastī se bhī be-ḳhabar

na ma.alūm kyā yaad aayā mujhe

ḳhudā jaane thā ḳhvāb meñ kyā samāñ

are dard-e-dil kyuuñ jagāyā mujhe

sitam karte mil kar to phir lutf thā

judā.ī meñ kyā āzmāyā mujhe

ḳhudā.ī se terī nahīñ kuchh ġharz

milā us sanam se ḳhudāyā mujhe

na dekhā kuchh un meñ juz andāz-e-jaur

magar vo bhī kyā thā jo bhāyā mujhe

jafā se vafā se ki az rāh-e-nāz

ġharaz jis tarah ho lubhāyā mujhe

vafā kā gila kyā karūñ 'benazīr'

ye kyā kam hai jo bas satāyā mujhe

tere gham ne ye din dikhaya mujhe

ki mujh se hi aaKHir chhuDaya mujhe

hua apni hasti se bhi be-KHabar

na malum kya yaad aaya mujhe

KHuda jaane tha KHwab mein kya saman

are dard-e-dil kyun jagaya mujhe

sitam karte mil kar to phir lutf tha

judai mein kya aazmaya mujhe

KHudai se teri nahin kuchh gharz

mila us sanam se KHudaya mujhe

na dekha kuchh un mein juz andaz-e-jaur

magar wo bhi kya tha jo bhaya mujhe

jafa se wafa se ki az rah-e-naz

gharaz jis tarah ho lubhaya mujhe

wafa ka gila kya karun 'benazir'

ye kya kam hai jo bas sataya mujhe