تیرے غم نے یہ دن دکھایا مجھے

تیرے غم نے یہ دن دکھایا مجھے

کہ مجھ سے ہی آخر چھڑایا مجھے

ہوا اپنی ہستی سے بھی بے خبر

نہ معلوم کیا یاد آیا مجھے

خدا جانے تھا خواب میں کیا سماں

ارے درد دل کیوں جگایا مجھے

ستم کرتے مل کر تو پھر لطف تھا

جدائی میں کیا آزمایا مجھے

خدائی سے تیری نہیں کچھ غرض

ملا اس صنم سے خدایا مجھے

نہ دیکھا کچھ ان میں جز انداز جور

مگر وہ بھی کیا تھا جو بھایا مجھے

جفا سے وفا سے کہ از راہ ناز

غرض جس طرح ہو لبھایا مجھے

وفا کا گلہ کیا کروں بے نظیرؔ

یہ کیا کم ہے جو بس ستایا مجھے