kudurat koi dur aahon se hogi

kudūrat koī duur aahoñ se hogī

safā.ī na kuchh un gavāhoñ se hogī

marī un kī dar-parda rāhoñ se hogī

ishāroñ se hogī nigāhoñ se hogī

tajallī-e-rahmat gunāhoñ se hogī

ye raunaq hamīñ rūsiyāhoñ se hogī

qayāmat kisī kī nigāhoñ se hogī

ḳhudā.ī bharī dād-ḳhvāhoñ se hogī

ye dair-o-haram kufr-o-islām kab tak

ye manzil na tai in dorāhoñ se hogī

chamak meñ jo bijlī kī ye shoḳhiyāñ haiñ

lagāvaT kisī kī nigāhoñ se hogī

tirī baat bhī ḳhair sun leñge vaa.iz

koī dam jo fursat gunāhoñ se hogī

vo rindī taqaddus ho qurbān jis par

bhalā un mashīḳhat-panāhoñ se hogī

kahāñ DhūñDhtā hai tū rahmat ko zāhid

vo dast-o-garebāñ gunāhoñ se hogī

burī rasm hai shāhid-o-mai kī lekin

ye jaarī unhīñ ḳhānqāhoñ se hogī

vo roz-e-jazā qābil-e-dīd hogā

jahāñ un se kuchh dād-ḳhvāhoñ se hogī

bagūle bhī zīnat haiñ dasht-e-junūñ kī

mirī qadr un hī bārgāhoñ se hogī

vahāñ kaun pūchhegā rindoñ ko zāhid

jahāñ be-gunāhī gunāhoñ se hogī

mire ghar na aa.eñ na mujh ko balā.eñ

mulāqāt ab aur rāhoñ se hogī

samajhte hoñ jo arsh farsh-e-zamīñ ko

faqīrī unhīñ bādshāhoñ se hogī

sazā-e-mohabbat dilā.eñgī āñkheñ

ye rusvā.ī in do gavāhoñ se hogī

karo qatl be-jā magar yaad rakkho

nadāmat bahut be-gunāhoñ se hogī

nazāre kā mahshar meñ kyā lutf ham ko

jagah bhī vahāñ dād-ḳhvāhoñ se hogī

gumān-e-duā 'beأnazīr'-e-hazīñ par

na aisī ḳhatā ḳhair-ḳhvāhoñ se hogī

kudurat koi dur aahon se hogi

safai na kuchh un gawahon se hogi

mari un ki dar-parda rahon se hogi

ishaaron se hogi nigahon se hogi

tajalli-e-rahmat gunahon se hogi

ye raunaq hamin rusiyahon se hogi

qayamat kisi ki nigahon se hogi

KHudai bhari dad-KHwahon se hogi

ye dair-o-haram kufr-o-islam kab tak

ye manzil na tai in dorahon se hogi

chamak mein jo bijli ki ye shoKHiyan hain

lagawaT kisi ki nigahon se hogi

teri baat bhi KHair sun lenge waiz

koi dam jo fursat gunahon se hogi

wo rindi taqaddus ho qurban jis par

bhala un mashiKHat-panahon se hogi

kahan DhunDhta hai tu rahmat ko zahid

wo dast-o-gareban gunahon se hogi

buri rasm hai shahid-o-mai ki lekin

ye jari unhin KHanqahon se hogi

wo roz-e-jaza qabil-e-did hoga

jahan un se kuchh dad-KHwahon se hogi

bagule bhi zinat hain dasht-e-junun ki

meri qadr un hi bargahon se hogi

wahan kaun puchhega rindon ko zahid

jahan be-gunahi gunahon se hogi

mere ghar na aaen na mujh ko balaen

mulaqat ab aur rahon se hogi

samajhte hon jo arsh farsh-e-zamin ko

faqiri unhin baadshahon se hogi

saza-e-mohabbat dilaengi aankhen

ye ruswai in do gawahon se hogi

karo qatl be-ja magar yaad rakkho

nadamat bahut be-gunahon se hogi

nazare ka mahshar mein kya lutf hum ko

jagah bhi wahan dad-KHwahon se hogi

guman-e-dua 'beأnazir'-e-hazin par

na aisi KHata KHair-KHwahon se hogi