zor-e-paikan se uDa kar le gaya naKHchir ko

zor-e-paikāñ se uḌā kar le gayā naḳhchīr ko

ab maiñ apne dil ko DhūñDūñ yā tumhāre tiir ko

kar liyā us ne sharīk-e-jor charḳh-e-pīr ko

ab hameñ bhī zor kuchh denā paḌā tadbīr ko

ḳhūn-e-nāhaq rafta rafta kaam apnā kar gayā

morcha ban ban ke āḳhir khā gayā shamshīr ko

josh-e-ḳhajlat se raho tum hazrat-e-dil aab aab

aag de duuñ maiñ to aisī āh-e-be-tāsīr ko

ḳhizr himmat kā hai jūyāñ dasht-e-ġham meñ kaun dil

DhūñDhtā hai ye murīd-e-ishq kis ko piir ko

ye ḳhadañg-e-dil-nashīñ mujh se tū khiñch saktā nahīñ

haañ agar tum se khiñche to khiñch lo is tiir ko

maiñ ḳhushāmad se nahīñ kahtā tumheñ yusuf-jamāl

ḳhud milā kar dekh lo tasvīr se tasvīr ko

donoñ da.avā haiñ barābar ke barābar ho talāsh

tum hamāre dil ko DhūñDho ham tumhāre tiir ko

ai falak ye kaj-ravī har-vaqt kī achchhī nahīñ

varna tū ḳhud jāntā hai nāla-e-shab-gīr ko

ḳhārzār-e-ishq meñ yūñhīñ qadam uThte na the

zo.af ne kuchh aur bhārī kar diyā zanjīr ko

iztirār-e-dil se ab tak aah niklī hī na thī

rokne vaalā koī ab rok le tāsīr ko

rāt-bhar phirtā thā kan.āñ meñ zuleḳhā kā ḳhayāl

misr ko yūsuf chale us ḳhvāb kī ta.abīr ko

qabr par dāman-kashāñ hī aao aao to sahī

phir jhaTak denā hamārī ḳhāk-e-dāman-gīr ko

to shab-e-ġham past kar detī hai saare hausle

sub.h se tā-shām uThātā huuñ maiñ is ta.amīr ko

ba.ad mere ek bhī majnūñ nazar aatā nahīñ

kis ke sar mārūñ maiñ apne paañv kī zanjīr ko

vaa.e qismat sham.a pūchhe bhī na parvānoñ kī baat

aur be-minnat mileñ bose lab-e-gul-gīr ko

koī letā hī na thā TuuTā huā dil 'benazīr'

laa.e rone ko hamīñ phūTī huī taqdīr ko

zor-e-paikan se uDa kar le gaya naKHchir ko

ab main apne dil ko DhunDun ya tumhaare tir ko

kar liya us ne sharik-e-jor charKH-e-pir ko

ab hamein bhi zor kuchh dena paDa tadbir ko

KHun-e-nahaq rafta rafta kaam apna kar gaya

morcha ban ban ke aaKHir kha gaya shamshir ko

josh-e-KHajlat se raho tum hazrat-e-dil aab aab

aag de dun main to aisi aah-e-be-tasir ko

KHizr himmat ka hai juyan dasht-e-gham mein kaun dil

DhunDhta hai ye murid-e-ishq kis ko pir ko

ye KHadang-e-dil-nashin mujh se tu khinch sakta nahin

han agar tum se khinche to khinch lo is tir ko

main KHushamad se nahin kahta tumhein yusuf-jamal

KHud mila kar dekh lo taswir se taswir ko

donon dawa hain barabar ke barabar ho talash

tum hamare dil ko DhunDho hum tumhaare tir ko

ai falak ye kaj-rawi har-waqt ki achchhi nahin

warna tu KHud jaanta hai nala-e-shab-gir ko

KHarzar-e-ishq mein yunhin qadam uThte na the

zoaf ne kuchh aur bhaari kar diya zanjir ko

iztirar-e-dil se ab tak aah nikli hi na thi

rokne wala koi ab rok le tasir ko

raat-bhar phirta tha kanāñ mein zuleKHa ka KHayal

misr ko yusuf chale us KHwab ki tabir ko

qabr par daman-kashan hi aao aao to sahi

phir jhaTak dena hamari KHak-e-daman-gir ko

to shab-e-gham past kar deti hai sare hausle

subh se ta-sham uThata hun main is tamir ko

baad mere ek bhi majnun nazar aata nahin

kis ke sar marun main apne panw ki zanjir ko

wae qismat shama puchhe bhi na parwanon ki baat

aur be-minnat milen bose lab-e-gul-gir ko

koi leta hi na tha TuTa hua dil 'benazir'

lae rone ko hamin phuTi hui taqdir ko