wo mahtab ki aasman par numud

vo mahtāb kī āsmāñ par numūd

muzayyan kavākib se charḳh-e-kabūd

vo kirnoñ kī shabnam ke andar bahār

uḌāyā hai chāndī kā goyā ġhubār

laraztī hai paanī pe ye chāñdnī

ki dariyā meñ bijlī kī hai raushnī

vo lahreñ kahīñ tilmilātī huī

chamak ā.īne kī dikhātī huī

nahīñ naam ko jo kahīñ tīrgī

ki 'aks-e-tajallī hai saay meñ jo

ravāñ hai ye chāroñ taraf mauj-e-nūr

ki uḌte haiñ din kī tarah kuchh tuyūr

shu'āoñ kī allāh re teziyāñ

qamar ke vo joban kī nau-kHeziyāñ

magar chhoTe chhoTe sitāre haiñ maañd

ki aaj apne jalve meñ puurā hai chāñd

shu'āoñ kā vo jagmagānā kahīñ

sitāroñ kā āñkheñ churānā kahīñ

girā chhan ke pattoñ se nūr-e-qamar

ki hiire ke TukḌe paḌe haiñ idhar

ye saay meñ aurāq se nuur ke

ki gul sañg-e-mūsā pe billor ke

kahīñ chahchahā.e hiiñ kuchh kuchh tuyūr

kahīñ shor kavvoñ kā hai duur duur

sitāre jū rah rah ke TuuTe idhar

vo mahtāb ke phuul the sar-ba-sar

huī chāñdnī pe tajallī fishāñ

ki hai 'ālam-e-vajd meñ āsmāñ

safā bām-o-dar meñ samā.ī huī

daraḳhtoñ pe hairat sī chhā.ī huī

ye kahtā hai har ik shajar kā sukūt

fa-sub.hānahū al-lazī lā-yamūt

wo mahtab ki aasman par numud

muzayyan kawakib se charKH-e-kabud

wo kirnon ki shabnam ke andar bahaar

uDaya hai chandi ka goya ghubar

larazti hai pani pe ye chandni

ki dariya mein bijli ki hai raushni

wo lahren kahin tilmilati huī

chamak aaine ki dikhati hui

nahin nam ko jo kahin tirgi

ki 'aks-e-tajalli hai say mein jo

rawan hai ye chaaron taraf mauj-e-nur

ki uDte hain din ki tarah kuchh tuyur

shu'aon ki allah re teziyan

qamar ke wo joban ki nau-kHeziyan

magar chhoTe chhoTe sitare hain mand

ki aaj apne jalwe mein pura hai chand

shu'aon ka wo jagmagana kahin

sitaron ka aankhen churana kahin

gira chhan ke patton se nur-e-qamar

ki hire ke TukDe paDe hain idhar

ye say mein auraq se nur ke

ki gul sang-e-musa pe billor ke

kahin chahchahae hin kuchh kuchh tuyur

kahin shor kawwon ka hai dur dur

sitare ju rah rah ke TuTe idhar

wo mahtab ke phul the sar-ba-sar

hui chandni pe tajalli fishan

ki hai 'alam-e-wajd mein aasman

safa baam-o-dar mein samai hui

daraKHton pe hairat si chhai hui

ye kahta hai har ek shajar ka sukut

fa-subhanahu al-lazi la-yamut