وہ مہتاب کی آسماں پر نمود

وہ مہتاب کی آسماں پر نمود

مزین کواکب سے چرخ کبود

وہ کرنوں کی شبنم کے اندر بہار

اڑایا ہے چاندی کا گویا غبار

لرزتی ہے پانی پہ یہ چاندنی

کہ دریا میں بجلی کی ہے روشنی

وہ لہریں کہیں تلملاتی ہوئی

چمک آئینے کی دکھاتی ہوئی

نہیں نام کو بھی کہیں تیرگی

کہ عکس تجلی ہے ساے میں بھی

رواں ہے یہ چاروں طرف موج نور

کہ اڑتے ہیں دن کی طرح کچھ طیور

شعاعوں کی اللہ رے تیزیاں

قمر کے وہ جوبن کی نو خیزیاں

مگر چھوٹے چھوٹے ستارے ہیں ماند

کہ آج اپنے جلوے میں پورا ہے چاند

شعاعوں کا وہ جگمگانا کہیں

ستاروں کا آنکھیں چرانا کہیں

گرا چھن کے پتوں سے نور قمر

کہ ہیرے کے ٹکڑے پڑے ہیں ادھر

یہ ساے میں اوراق سے نور کے

کہ گل سنگ موسیٰ پہ بلور کے

کہیں چہچہائے ہیں کچھ کچھ طیور

کہیں شور کوؤں کا ہے دور دور

ستارے جو رہ رہ کے ٹوٹے ادھر

وہ مہتاب کے پھول تھے سر بہ سر

ہوئی چاندنی پہ تجلی فشاں

کہ ہے عالم وجد میں آسماں

صفا بام و در میں سمائی ہوئی

درختوں پہ حیرت سی چھائی ہوئی

یہ کہتا ہے ہر اک شجر کا سکوت

فسبحانہ الذی لا یموت