gham-e-dil mein itna asar bhi nahin

ġham-e-dil meñ itnā asar bhī nahīñ

maiñ bismil huuñ un ko ḳhabar hī nahīñ

mujhe khaa.e jaatā hai ye kis kā ġham

abhī dil na thā ab jigar bhī nahīñ

kahāñ tak sunoge mirī dāstāñ

nahīñ tuul to muḳhtasar bhī nahīñ

huī un ke aane se yaas is qadar

ki ab jānib-e-dar nazar bhī nahīñ

jo kuchh din rahā josh-e-saudā yahī

to phir dekh lenā ki sar bhī nahīñ

banāyā mujhe ġham ne tasvīr-e-yās

unheñ rahm is haal par bhī nahīñ

zamāne meñ ma.ashūq ai 'benazīr'

satāte haiñ par is qadar bhī nahīñ

gham-e-dil mein itna asar bhi nahin

main bismil hun un ko KHabar hi nahin

mujhe khae jata hai ye kis ka gham

abhi dil na tha ab jigar bhi nahin

kahan tak sunoge meri dastan

nahin tul to muKHtasar bhi nahin

hui un ke aane se yas is qadar

ki ab jaanib-e-dar nazar bhi nahin

jo kuchh din raha josh-e-sauda yahī

to phir dekh lena ki sar bhi nahin

banaya mujhe gham ne taswir-e-yas

unhen rahm is haal par bhi nahin

zamane mein mashuq ai 'benazir'

satate hain par is qadar bhi nahin