غم دل میں اتنا اثر بھی نہیں

غم دل میں اتنا اثر بھی نہیں

میں بسمل ہوں ان کو خبر ہی نہیں

مجھے کھائے جاتا ہے یہ کس کا غم

ابھی دل نہ تھا اب جگر بھی نہیں

کہاں تک سنو گے مری داستاں

نہیں طول تو مختصر بھی نہیں

ہوئی ان کے آنے سے یاس اس قدر

کہ اب جانب در نظر بھی نہیں

جو کچھ دن رہا جوش سودا یہی

تو پھر دیکھ لینا کہ سر بھی نہیں

بنایا مجھے غم نے تصویر یاس

انہیں رحم اس حال پر بھی نہیں

زمانے میں معشوق اے بے نظیرؔ

ستاتے ہیں پر اس قدر بھی نہیں