bhale-bure par kisi ke tujhe nazar bhi hai

bhale-bure par kisī ke tujhe nazar bhī hai

huā na ḳhauf-e-jahāñ kuchh ḳhudā kā Dar bhī hai

jafā-o-jaur kahāñ tak ḳhudā se Dar zālim

sivā-e-dil-shiknī aur kuchh hunar bhī hai

sitam-zarīf na ho is qadar ġharīboñ se

har ek chiiz kā āḳhir ko kuchh samar bhī hai

hamesha kūche meñ din-rāt shor karatā hai

koī to pūchho ki ḳhāna-ḳharāb ghar bhī hai

nahīñ haiñ lā’l-o-guhar paas mere go lekin

jigar ke TukḌe haiñ aur yār-e-chashm-e-tar bhī hai

dil-e-ġharīb kā ahvāl pūchhte ho kyā

chaḌhī hai 'ishq' kī tap aur dard-e-sar bhī hai

bhale-bure par kisi ke tujhe nazar bhi hai

hua na KHauf-e-jahan kuchh KHuda ka Dar bhi hai

jafa-o-jaur kahan tak KHuda se Dar zalim

siwa-e-dil-shikni aur kuchh hunar bhi hai

sitam-zarif na ho is qadar gharibon se

har ek chiz ka aaKHir ko kuchh samar bhi hai

hamesha kuche mein din-raat shor karata hai

koi to puchho ki KHana-KHarab ghar bhi hai

nahin hain la’l-o-guhar pas mere go lekin

jigar ke TukDe hain aur yar-e-chashm-e-tar bhi hai

dil-e-gharib ka ahwal puchhte ho kya

chaDhi hai 'ishq' ki tap aur dard-e-sar bhi hai