bimar-e-gham azal se hum aaghosh ho gaya

bīmār-e-ġham azal se ham āġhosh ho gayā

ik āh-e-sard khīñch ke ḳhāmosh ho gayā

piirī meñ dil se miT gayā dāġh-e-ġham firāq

shab kā charāġh sub.h ko ḳhāmosh ho gayā

ġhurbat meñ itne din mujhe rahte guzar ga.e

ahl-e-vatan ke dil se farāmosh ho gayā

jab naza.a meñ kisī se na paayā koī javāb

meñ umr bhar ke vāste ḳhāmosh ho gayā

is bazm-e-nāz meñ na sunā jab kisī ne haal

maiñ sab ke muñh ko dekh ke ḳhāmosh ho gayā

hai mujh ko ba.ad marne ke phir ārzū-e-marg

ye kaun mere ġham meñ siyah-posh ho gayā

kyā baat hai jo bhuul rahā huuñ maiñ aap ko

shāyad ki tere dil se farāmosh ho gayā

mohar-e-sukūt thā tirī rusvā.iyoñ kā ḳhauf

dil thā magar maiñ hashr meñ ḳhāmosh ho gayā

phir us ke ba.ad koī ḳhabar bhī nahīñ rahī

parda uThā hī thā ki maiñ behosh ho gayā

zālim tirī nigāh meñ jaadū kā hai asar

shikvā har ek dil se farāmosh ho gayā

anjām kī ḳhabar nahii. kuchh bhī mujhe 'amīn'

maiñ ibtidā-e-ishq meñ behosh ho gayā

bimar-e-gham azal se hum aaghosh ho gaya

ek aah-e-sard khinch ke KHamosh ho gaya

piri mein dil se miT gaya dagh-e-gham firaq

shab ka charagh subh ko KHamosh ho gaya

ghurbat mein itne din mujhe rahte guzar gae

ahl-e-watan ke dil se faramosh ho gaya

jab naza mein kisi se na paya koi jawab

mein umr bhar ke waste KHamosh ho gaya

is bazm-e-naz mein na suna jab kisi ne haal

main sab ke munh ko dekh ke KHamosh ho gaya

hai mujh ko baad marne ke phir aarzu-e-marg

ye kaun mere gham mein siyah-posh ho gaya

kya baat hai jo bhul raha hun main aap ko

shayad ki tere dil se faramosh ho gaya

mohar-e-sukut tha teri ruswaiyon ka KHauf

dil tha magar main hashr mein KHamosh ho gaya

phir us ke baad koi KHabar bhi nahin rahi

parda uTha hi tha ki main behosh ho gaya

zalim teri nigah mein jadu ka hai asar

shikwa har ek dil se faramosh ho gaya

anjam ki KHabar nahi kuchh bhi mujhe 'amin'

main ibtida-e-ishq mein behosh ho gaya