بیمار غم ازل سے ہم آغوش ہو گیا

بیمار غم ازل سے ہم آغوش ہو گیا

اک آہ سرد کھینچ کے خاموش ہو گیا

پیری میں دل سے مٹ گیا داغ غم فراق

شب کا چراغ صبح کو خاموش ہو گیا

غربت میں اتنے دن مجھے رہتے گزر گئے

اہل وطن کے دل سے فراموش ہو گیا

جب نزع میں کسی سے نہ پایا کوئی جواب

میں عمر بھر کے واسطے خاموش ہو گیا

اس بزم ناز میں نہ سنا جب کسی نے حال

میں سب کے منہ کو دیکھ کے خاموش ہو گیا

ہے مجھ کو بعد مرنے کے پھر آرزوئے مرگ

یہ کون میرے غم میں سیہ پوش ہو گیا

کیا بات ہے جو بھول رہا ہوں میں آپ کو

شاید کہ تیرے دل سے فراموش ہو گیا

مہر سکوت تھا تری رسوائیوں کا خوف

دل تھا مگر میں حشر میں خاموش ہو گیا

پھر اس کے بعد کوئی خبر بھی نہیں رہی

پردہ اٹھا ہی تھا کہ میں بے ہوش ہو گیا

ظالم تری نگاہ میں جادو کا ہے اثر

شکوہ ہر ایک دل سے فراموش ہو گیا

انجام کی خبر نہیں کچھ بھی مجھے امینؔ

میں ابتدائے عشق میں بے ہوش ہو گیا