rangin shafaq jab hua ju-e-bar ka

rañgīñ shafaq jab huā jū-e-bār kā

dāman laTak rahā hai urūs-e-bahār kā

shahrā hai aamad aamad fasl-e-bahār kā

har naḳhl muntazir hai na.e barg-o-bār kā

aa.ī bahār chaar taraf aag sī lagī

har lāla-zār ā.īna hai sho.ala-zār kā

hai dām-e-sad ummīd meñ bulbul kā dil asiir

aayā hai gulistāñ meñ zamāna bahār kā

mahfil meñ faiz saaqī aadil kā aam hai

paimāna be-sharāb hai kis bāda-ḳhvār kā

saare jahāñ meñ aap jo mash.hūr aaj haiñ

ehsāñ kahīñ na ho ye usī ḳhāksār kā

duniyā-e-rañg-o-bū meñ basar zindagī hu.vī

meñ āshnā huuñ raaz ḳhizāñ-o-bahār kā

shāḳh-e-murād jis kī na phūle phalai kabhī

vo naḳhl-e-ġham huuñ maiñ chaman-e-rozgār kā

kāñTe jo pāsbāñ haiñ to gul mutma.in nahīñ

gulchīñ ke dil meñ ḳhauf nahīñ nok-e-ḳhār kā

is gul ko fikr kyā mire hāl-e-ḳharāb kī

din raat jo hai mast ḳhud apnī bahār kā

ai nāznīñ jo aaTh pahar mast-e-nāz hai

kuchh hāl-e-ġham bhī sun dil-e-hasrat shi.ār kā

din ko sukūñ nasīb na shab ko nasīb chain

rañgīn na pūchh haal dil-e-sogvār kā

rangin shafaq jab hua ju-e-bar ka

daman laTak raha hai urus-e-bahaar ka

shahra hai aamad aamad fasl-e-bahaar ka

har naKHl muntazir hai nae barg-o-bar ka

aai bahaar chaar taraf aag si lagi

har lala-zar aaina hai shoala-zar ka

hai dam-e-sad ummid mein bulbul ka dil asir

aaya hai gulistan mein zamana bahaar ka

mahfil mein faiz saqi aadil ka aam hai

paimana be-sharab hai kis baada-KHwar ka

sare jahan mein aap jo mashhur aaj hain

ehsan kahin na ho ye usi KHaksar ka

duniya-e-rang-o-bu mein basar zindagi huwi

mein aashna hun raaz KHizan-o-bahaar ka

shaKH-e-murad jis ki na phule phalai kabhi

wo naKHl-e-gham hun main chaman-e-rozgar ka

kanTe jo pasban hain to gul mutmain nahin

gulchin ke dil mein KHauf nahin nok-e-KHar ka

is gul ko fikr kya mere haal-e-KHarab ki

din raat jo hai mast KHud apni bahaar ka

ai naznin jo aaTh pahar mast-e-naz hai

kuchh haal-e-gham bhi sun dil-e-hasrat shiar ka

din ko sukun nasib na shab ko nasib chain

rangin na puchh haal dil-e-sogwar ka