butan-e-hashr taza rang bhar din dagh-e-isyan mein

butān-e-hashr taaza rañg bhar diiñ dāġh-e-isyāñ meñ

mazā de jaa.e merā dāġh-e-isyāñ mere dāmāñ meñ

bhare haiñ hashr zā fitne nigāh-e-fitna-e-sāmāñ meñ

jagah de kyā dil-e-hañgāma jo kū apne dāmāñ meñ

lagānā dik meñ aisā kaun sā surḳhāb kā parhtā

ki mere dil ke TukḌoñ ne jaḌe la.al un ke paikāñ meñ

mare lab tak ye aa.eñ hashr ke din jaam ban ban kar

jo dāġh-e-mai khile haiñ phuul ban kar mere dāmāñ meñ

tulī baiThī hai kaisī ashk-ālūda mizha merī

piro.e jā.eñge motī tirī zulf-e-pareshāñ meñ

jo ai dīvānoñ maiñ hotā to kyā hotā ḳhudā jaane

na hone se mare ab ḳhaak uḌtī hai bayābāñ meñ

garebāñ par mare kyuuñ hashr ke din haath Daalā thā

ulajh kar dast-e-nāzuk rah ga.e ab to garebāñ meñ

chaḌhā.e ḳhum ke ḳhum lekin na nashsha ho na ġhāfil ho

farishta hai vo ai zāhid jo ye bāteñ hoñ insāñ meñ

zarā meñ bhī vañh apnī shab-e-furqat ko le jā۔ūñ

hamesha din banā kartī haiñ rāteñ jis shabistāñ meñ

are saaqī na thā kuchh ham meñ jab tak shīsha ḳhālī thā

jo mai shīshe meñ aa.ī jaan aa.ī jism-e-be-jāñ meñ

mileñ to un ko dikhlā.ūñ masaknā un ke dāman kā

yahī kāfir jo raḳhne Dālte haiñ mere īmāñ meñ

hameñ to lutf aatā hai vo jhūTe hoñ ki sachche hoñ

ajab lazzat hai un kāfir butoñ ke ahd-o-paimāñ meñ

nazar aatī hai aksar ruuh mujh se par shikasta kī

kisī TuuTe qafas meñ yā kisī ujḌe gulistāñ meñ

hamāre dil ke dāġhoñ kī vañh sham.eñ huiiñ raushan

hamārī aañkh ke parde paḌe un ke shabistāñ meñ

rahā kartī hai sote jāgte us kī nazar mujh par

ye bedārī kahāñ se aa ga.ī chashm-e-nigahbāñ meñ

zarā sī vasl kī shab yā baḌī sī hijr kī shab ho

chhipī rahtī haiñ donoñ un hasīnoñ kī nahīñ haañ meñ

hamārī jaan chhūTe gī asīrī se na jiite jī

lahad kī tarh rakkhā hai jasad ke tañg-e-zindāñ meñ

'riyāz' iimā hai un kā ham-navā hoñ murġh-e-gulshan meñ

huī hai mun.aqid bazm-e-suḳhan sehn-e-gulistāñ meñ

butan-e-hashr taza rang bhar din dagh-e-isyan mein

maza de jae mera dagh-e-isyan mere daman mein

bhare hain hashr za fitne nigah-e-fitna-e-saman mein

jagah de kya dil-e-hangama jo ku apne daman mein

lagana dik mein aisa kaun sa surKHab ka parhta

ki mere dil ke TukDon ne jaDe lal un ke paikan mein

mare lab tak ye aaen hashr ke din jam ban ban kar

jo dagh-e-mai khile hain phul ban kar mere daman mein

tuli baiThi hai kaisi ashk-aluda mizha meri

piroe jaenge moti teri zulf-e-pareshan mein

jo ai diwanon main hota to kya hota KHuda jaane

na hone se mare ab KHak uDti hai bayaban mein

gareban par mare kyun hashr ke din hath Dala tha

ulajh kar dast-e-nazuk rah gae ab to gareban mein

chaDhae KHum ke KHum lekin na nashsha ho na ghafil ho

farishta hai wo ai zahid jo ye baaten hon insan mein

zara mein bhi wanh apni shab-e-furqat ko le ja۔un

hamesha din bana karti hain raaten jis shabistan mein

are saqi na tha kuchh hum mein jab tak shisha KHali tha

jo mai shishe mein aai jaan aai jism-e-be-jaan mein

milen to un ko dikhlaun masakna un ke daman ka

yahi kafir jo raKHne Dalte hain mere iman mein

hamein to lutf aata hai wo jhuTe hon ki sachche hon

ajab lazzat hai un kafir buton ke ahd-o-paiman mein

nazar aati hai aksar ruh mujh se par shikasta ki

kisi TuTe qafas mein ya kisi ujDe gulistan mein

hamare dil ke daghon ki wanh shamen huin raushan

hamari aankh ke parde paDe un ke shabistan mein

raha karti hai sote jagte us ki nazar mujh par

ye bedari kahan se aa gai chashm-e-nigahban mein

zara si wasl ki shab ya baDi si hijr ki shab ho

chhipi rahti hain donon un hasinon ki nahin han mein

hamari jaan chhuTe gi asiri se na jite ji

lahad ki tarh rakkha hai jasad ke tang-e-zindan mein

'riyaz' ima hai un ka ham-nawa hon murgh-e-gulshan mein

hui hai munaqid bazm-e-suKHan sehn-e-gulistan mein