bu-e-gul sabza-e-gulzar kahan se laun

bū-e-gul sabza-e-gulzār kahāñ se lā.ūñ

jām-e-mai abr-guhar-bār kahāñ se lā.ūñ

gul-ruḳh-o-baba-e-gulrañg mayassar lekin

vo javānī-e-sīya-kār kahāñ se lā.ūñ

haaye vo lazzat-e-ra.anā.ī-e-chashm-e-maḳhmūr

vo tirī masti-e-raftār kahāñ se lā.ūñ

takHta-e-lāl-o-gul kā sā hasīñ vo dāman

haaye vo dīda-e-kHūñbār kahāñ se lā.ūñ

ġharq rakhtī thiiñ jise nuur kī maujeñ ya.anī

vo dil-e-husn giraftār kahāñ se lā.ūñ

jaan betāb ko ho jaa.e sukūñ phir paidā

ab tujhe nargis-e-bīmār kahāñ se lā.ūñ

husn rañgīñ ke taḌapte nazar aa.e jalve

mastī-e-bāda-kHumār kahāñ se lā.ūñ

tire kūche meñ na thī fikr alā.eq dil ko

ab tujhe gesū-e-ḳhamdār kahāñ se lā.ūñ

zarra zarra meñ nihāñ raaz hai un kā lekin

dīda-e-vāqif-e-isrār kahāñ se lā.ūñ

us ne kuchh soch ke mahrūm-e-jafā rakhā hai

phir vahī lazzat-e-āzār kahāñ se lā.ūñ

ek muddat se hai ḳhāmosh rubāb-e-hastī

phir vahī naġhma-e-bedār kahāñ se lā.ūñ

hai mujhe kashmakash halqa-e-zulf-e-daurāñ

shikan-e-turra-e-tarrār kahāñ se lā.ūñ

jab na kuchh zauq-e-amal husn-e-talab ho dil meñ

lazzat-e-mastī-e-kirdār kahāñ se lā.ūñ

faiz vo asġhar marhūm kā rañgīñ andāz

us kī vo shaukHī-e-guftār kahāñ se lā.ūñ

bu-e-gul sabza-e-gulzar kahan se laun

jam-e-mai abr-guhar-bar kahan se laun

gul-ruKH-o-baba-e-gulrang mayassar lekin

wo jawani-e-siya-kar kahan se laun

haye wo lazzat-e-ranai-e-chashm-e-maKHmur

wo teri masti-e-raftar kahan se laun

takHta-e-lal-o-gul ka sa hasin wo daman

haye wo dida-e-kHunbar kahan se laun

gharq rakhti thin jise nur ki maujen yani

wo dil-e-husn giraftar kahan se laun

jaan betab ko ho jae sukun phir paida

ab tujhe nargis-e-bimar kahan se laun

husn rangin ke taDapte nazar aae jalwe

masti-e-baada-kHumar kahan se laun

tere kuche mein na thi fikr alaeq dil ko

ab tujhe gesu-e-KHamdar kahan se laun

zarra zarra mein nihan raaz hai un ka lekin

dida-e-waqif-e-israr kahan se laun

us ne kuchh soch ke mahrum-e-jafa rakha hai

phir wahi lazzat-e-azar kahan se laun

ek muddat se hai KHamosh rubab-e-hasti

phir wahi naghma-e-bedar kahan se laun

hai mujhe kashmakash halqa-e-zulf-e-dauran

shikan-e-turra-e-tarrar kahan se laun

jab na kuchh zauq-e-amal husn-e-talab ho dil mein

lazzat-e-masti-e-kirdar kahan se laun

faiz wo asghar marhum ka rangin andaz

us ki wo shaukHi-e-guftar kahan se laun