chale aate hain KHush KHush kis ke ghar se

chale aate haiñ ḳhush ḳhush kis ke ghar se

vo hañste khelte bād-e-sahar se

vahīñ aa baiThā uTh kar udhar se

milā hai ghar mirā dushman ke ghar se

maze kī chiiz hai ye majma.a-e-hashr

hasīñ kyā kyā guzarte haiñ nazar se

zarā chal kar tumhīñ us ko chuḌāo

kisī kī aaheñ uljhī haiñ asar se

hamāre paas dil sī chiiz rahtī

bachā.e rakhte haiñ un kī nazar se

kahāñ dil pā ga.e kyā pūchhte ho

uThā laa.e tumhārī rah-guzar se

havā par hai mizāj abr-e-karam kā

piyo rindo vo barse yā na barse

vo phir to dekhne kī chiiz ho gī

qayāmat jab uThe us rah-guzar se

hamāre paas jab dekho nayā dil

uThā laate haiñ un kī rah-guzar se

kahāñ rakkhī thī mahshar meñ ki piite

nichoḌī ham ne kuchh dāmān-e-tar se

hameñ to jiite jī kausar ko pilvā

ḳhudā-yā chhoḌ dī hai tere Dar se

'riyāz' us dil ke chalte ye huā haal

gire ham sab hasīnoñ kī nazar se

chale aate hain KHush KHush kis ke ghar se

wo hanste khelte baad-e-sahar se

wahin aa baiTha uTh kar udhar se

mila hai ghar mera dushman ke ghar se

maze ki chiz hai ye majma-e-hashr

hasin kya kya guzarte hain nazar se

zara chal kar tumhin us ko chuDao

kisi ki aahen uljhi hain asar se

hamare pas dil si chiz rahti

bachae rakhte hain un ki nazar se

kahan dil pa gae kya puchhte ho

uTha lae tumhaari rah-guzar se

hawa par hai mizaj abr-e-karam ka

piyo rindo wo barse ya na barse

wo phir to dekhne ki chiz ho gi

qayamat jab uThe us rah-guzar se

hamare pas jab dekho naya dil

uTha late hain un ki rah-guzar se

kahan rakkhi thi mahshar mein ki pite

nichoDi hum ne kuchh daman-e-tar se

hamein to jite ji kausar ko pilwa

KHuda-ya chhoD di hai tere Dar se

'riyaz' us dil ke chalte ye hua haal

gire hum sab hasinon ki nazar se