zahe talash ki sargarm-e-justuju ho kar

zahe talāsh ki sargarm-e-justujū ho kar

milā huuñ rañg meñ rañg aur bū meñ bū ho kar

tirī galī meñ tire dil kā naqsh hoke rahā

raqīb miT na gayā merī aabrū ho kar

vahāñ kalīm se vo naaz yaañ ye da.ave haiñ

kabhī hijāb na ho ham se guftugū ho kar

nigāh-e-shauq ne kyā ḳhvāb meñ nahīñ dekhā

nayā hijāb hai chhupte ho rū-ba-rū ho kar

nigah nigah se tirī vaar thā ki dil merā

mizha se Tapaktā rahā lahū ho kar

hamāre jazb-e-mohabbat ko dekhtā qātil

ki rah gayā terā ḳhanjar rag-e-gulū ho kar

butoñ ke ḳhauf se Dar-Dar ke rah gayā huuñ maiñ

hazār martaba āmāda-e-vuzū ho kar

huā huuñ maiñ bhī ai 'dāġh' apnā dushman aap

zamāna dost hai us kā mirā ’adū ho kar

zahe talash ki sargarm-e-justuju ho kar

mila hun rang mein rang aur bu mein bu ho kar

teri gali mein tere dil ka naqsh hoke raha

raqib miT na gaya meri aabru ho kar

wahan kalim se wo naz yan ye dawe hain

kabhi hijab na ho hum se guftugu ho kar

nigah-e-shauq ne kya KHwab mein nahin dekha

naya hijab hai chhupte ho ru-ba-ru ho kar

nigah nigah se teri war tha ki dil mera

mizha se Tapakta raha lahu ho kar

hamare jazb-e-mohabbat ko dekhta qatil

ki rah gaya tera KHanjar rag-e-gulu ho kar

buton ke KHauf se Dar-Dar ke rah gaya hun main

hazar martaba aamada-e-wuzu ho kar

hua hun main bhi ai 'dagh' apna dushman aap

zamana dost hai us ka mera ’adu ho kar