nikli falak se kam kisi sael ki aarzu

niklī falak se kam kisī saa.el kī aarzū

phir us pe aarzū bhī mire dil kī aarzū

hasrat hai us ko niklī na bismil kī aarzū

puurī kare ḳhudā mire qātil kī aarzū

hūroñ se kyā ġharaz thī 'abas bad-gumāñ na ho

jannat meñ le ga.ī tirī mahfil kī aarzū

yuuñ aah nā-rasā ko tamannā-e-'arsh hai

jaise kisī ġharīb ko manzil kī aarzū

ye nā-umīd-e-zīst vo mushtāq-e-raqs hai

bismil kī yaas dekhiye qātil kī aarzū

hai qais kā to shauq zamāne par āshakār

kyā jaane koī sāhib-e-mahmil kī aarzū

duniyā sarā-e-tañg hai mahshar hai jā-e-tañg

'āshiq kahāñ nikāl sake dil kī aarzū

dil har taraf rahā nigarāñ bahr-e-’ishaq meñ

is Dūbte ko rah ga.ī sāhil kī aarzū

pahchān lo faqīr kī sūrat savāl hai

tum jaan lo ye hai mire saa.el kī aarzū

yūsuf ne dekh kar tirī tasvīr ye kahā

kyuuñ ho na aisī shakl-o-shamā.il kī aarzū

rutba kamāl-e-'ishq kā hāsil nahīñ huā

ab 'dāġh' ko hai murshid-e-kāmil kī aarzū

nikli falak se kam kisi sael ki aarzu

phir us pe aarzu bhi mere dil ki aarzu

hasrat hai us ko nikli na bismil ki aarzu

puri kare KHuda mere qatil ki aarzu

huron se kya gharaz thi 'abas bad-guman na ho

jannat mein le gai teri mahfil ki aarzu

yun aah na-rasa ko tamanna-e-'arsh hai

jaise kisi gharib ko manzil ki aarzu

ye na-umid-e-zist wo mushtaq-e-raqs hai

bismil ki yas dekhiye qatil ki aarzu

hai qais ka to shauq zamane par aashakar

kya jaane koi sahib-e-mahmil ki aarzu

duniya sara-e-tang hai mahshar hai ja-e-tang

'ashiq kahan nikal sake dil ki aarzu

dil har taraf raha nigaran bahr-e-’ishaq mein

is Dubte ko rah gai sahil ki aarzu

pahchan lo faqir ki surat sawal hai

tum jaan lo ye hai mere sael ki aarzu

yusuf ne dekh kar teri taswir ye kaha

kyun ho na aisi shakl-o-shamail ki aarzu

rutba kamal-e-'ishq ka hasil nahin hua

ab 'dagh' ko hai murshid-e-kaamil ki aarzu