نکلی فلک سے کم کسی سائل کی آرزو

نکلی فلک سے کم کسی سائل کی آرزو

پھر اس پہ آرزو بھی مرے دل کی آرزو

حسرت ہے اس کو نکلی نہ بسمل کی آرزو

پوری کرے خدا مرے قاتل کی آرزو

حوروں سے کیا غرض تھی عبث بد گماں نہ ہو

جنت میں لے گئی تری محفل کی آرزو

یوں آہ نارسا کو تمنائے عرش ہے

جیسے کسی غریب کو منزل کی آرزو

یہ ناامید زیست وہ مشتاق رقص ہے

بسمل کی یاس دیکھیے قاتل کی آرزو

ہے قیس کا تو شوق زمانے پر آشکار

کیا جانے کوئی صاحب محمل کی آرزو

دنیا سرائے تنگ ہے محشر ہے جائے تنگ

عاشق کہاں نکال سکے دل کی آرزو

دل ہر طرف رہا نگراں بحر عشق میں

اس ڈوبتے کو رہ گئی ساحل کی آرزو

پہچان لو فقیر کی صورت سوال ہے

تم جان لو یہ ہے مرے سائل کی آرزو

یوسف نے دیکھ کر تری تصویر یہ کہا

کیوں ہو نہ ایسی شکل و شمائل کی آرزو

رتبہ کمال عشق کا حاصل نہیں ہوا

اب داغؔ کو ہے مرشد کامل کی آرزو