dekh ke be-KHudi meri aaj wo muskura diya

dekh ke be-ḳhudī mirī aaj vo muskurā diyā

ishq-e-junūñ-mizāj ne husn ko gudgudā diyā

pahle to dard-e-ishq se husn ne tilmilā diyā

phir usī dard-e-ishq ko vaj.h-e-sukūñ banā diyā

sar-ba-sujūd dekh kar dar se mujhe uThā diyā

maiñ ne savāl kyā kiyā us ne javāb kyā diyā

jazba-e-zabt-e-dard ne apnā asar dikhā diyā

husn ko ishq kar diyā ishq ko dil banā diyā

husn-e-nazar-navāz se shikva-e-be-ruḳhī ġhalat

ishq kā valvala diyā dard kā hausla diyā

ik adā-e-dilrubā ik nigāh-e-jāñ-sitāñ

jalva-e-rañg-rañg ne kaif-e-junūñ baḌhā diyā

vo haiñ idhar itaab meñ dil hai udhar azaab meñ

zauq-e-talab ne kyuuñ mujhe jalva-e-iltijā diyā

dil meñ taḌap jigar meñ dard siina meñ ek chamak sī hai

merī fazā-e-qalb ko ishq ne jagmagā diyā

naġhma-e-jāñ-navāz meñ nāla-e-dil-navāz meñ

ishq kā mājrā hī kyā jis ne sunā-sunā diyā

yās-o-ummīd yuuñ rahīñ rāh-e-talab meñ saath saath

chaar qadam haTā diyā chaar qadam baḌhā diyā

kitnī latīf hai 'zakī' kaifiyat junūn kī

hañsne lagā rulā diyā rone lagā hañsā diyā

dekh ke be-KHudi meri aaj wo muskura diya

ishq-e-junun-mizaj ne husn ko gudguda diya

pahle to dard-e-ishq se husn ne tilmila diya

phir usi dard-e-ishq ko wajh-e-sukun bana diya

sar-ba-sujud dekh kar dar se mujhe uTha diya

main ne sawal kya kiya us ne jawab kya diya

jazba-e-zabt-e-dard ne apna asar dikha diya

husn ko ishq kar diya ishq ko dil bana diya

husn-e-nazar-nawaz se shikwa-e-be-ruKHi ghalat

ishq ka walwala diya dard ka hausla diya

ek ada-e-dilruba ek nigah-e-jaan-sitan

jalwa-e-rang-rang ne kaif-e-junun baDha diya

wo hain idhar itab mein dil hai udhar azab mein

zauq-e-talab ne kyun mujhe jalwa-e-iltija diya

dil mein taDap jigar mein dard sina mein ek chamak si hai

meri faza-e-qalb ko ishq ne jagmaga diya

naghma-e-jaan-nawaz mein nala-e-dil-nawaz mein

ishq ka majra hi kya jis ne suna-suna diya

yas-o-ummid yun rahin rah-e-talab mein sath sath

chaar qadam haTa diya chaar qadam baDha diya

kitni latif hai 'zaki' kaifiyat junun ki

hansne laga rula diya rone laga hansa diya