dida-o-dil mein mere rakkha hai kya ai tuKHm-e-ashk

dīda-o-dil meñ mire rakkhā hai kyā ai tuḳhm-e-ashk

rañg paidā kar zamīñ meñ mil ke daane kī tarah

sūrat-e-ā.īna ai dil tā-kujā dīdār-e-ruḳh

ḳhaak chhān ab kūcha-e-gesū meñ shāne kī tarah

dard-e-dil avval to vo āshiq kā sunte hī nahīñ

aur jo sunte haiñ to sunte haiñ fasāne kī tarah

nāvak-andāz-e-nigah achchhī nahīñ ye tāñk-jhāñk

uḌ na jaaye dekhnā koī nishāne kī tarah

bāda-ḳhvār tum ko kyā ḳhurshīd-e-mahshar kā hai ḳhauf

chhā rahā hai abr-e-rahmat shāmiyāne kī tarah

jab kabhī aatā hai dil meñ terī choTī kā ḳhayāl

choT paḌtī hai jigar par tāziyāne kī tarah

ek baar ai barq taklīf aur kar jhagḌā miTe

phūñk de mujh ko bhī mere āshiyāne kī tarah

tum to aate hī qayāmat karte ho sāhab bapā

dil meñ aate ho to aao ghar meñ aane kī tarah

dar se ka.abe ke nahīñ uThtā sar apnā is liye

is meñ bhī kuchh kuchh hai tere āstāne kī tarah

o kamāñ-abrū idhar bhī sarsarī koī nigāh

tiir ke mushtāq ham bhī haiñ nishāne kī tarah

dil ko aa jaatā hai yād-e-sozan-e-mizgāñ se chain

zaḳhm meñ achchhī hai ye Tāñke lagāne kī tarah

kitne bedard is zamāne ke atibbā haiñ 'amīr'

haal bīmāroñ kā sunte haiñ fasāne kī tarah

dida-o-dil mein mere rakkha hai kya ai tuKHm-e-ashk

rang paida kar zamin mein mil ke dane ki tarah

surat-e-aina ai dil ta-kuja didar-e-ruKH

KHak chhan ab kucha-e-gesu mein shane ki tarah

dard-e-dil awwal to wo aashiq ka sunte hi nahin

aur jo sunte hain to sunte hain fasane ki tarah

nawak-andaz-e-nigah achchhi nahin ye tank-jhank

uD na jaye dekhna koi nishane ki tarah

baada-KHwar tum ko kya KHurshid-e-mahshar ka hai KHauf

chha rahā hai abr-e-rahmat shamiyane ki tarah

jab kabhī aata hai dil mein teri choTi ka KHayal

choT paDti hai jigar par taziyane ki tarah

ek bar ai barq taklif aur kar jhagDa miTe

phunk de mujh ko bhi mere aashiyane ki tarah

tum to aate hi qayamat karte ho sahab bapa

dil mein aate ho to aao ghar mein aane ki tarah

dar se kabe ke nahin uThta sar apna is liye

is mein bhi kuchh kuchh hai tere aastane ki tarah

o kaman-abru idhar bhi sarsari koi nigah

tir ke mushtaq hum bhi hain nishane ki tarah

dil ko aa jata hai yaad-e-sozan-e-mizgan se chain

zaKHm mein achchhi hai ye Tanke lagane ki tarah

kitne bedard is zamane ke atibba hain 'amir'

haal bimaron ka sunte hain fasane ki tarah