dil mein kya kya hawas-e-did baDhai na gai

dil meñ kyā kyā havas-e-dīd baḌhā.ī na ga.ī

rū-ba-rū un ke magar aañkh uThā.ī na ga.ī

ham razā sheva haiñ tāvīl-e-sitam ḳhud kar leñ

kyā huā un se agar baat banā.ī na ga.ī

ye bhī ādāb-e-mohabbat ne gavārā na kiyā

un kī tasvīr bhī āñkhoñ se lagā.ī na ga.ī

aah vo aañkh jo har samt rahī sā.iqa-pāsh

vo jo mujh se kisī unvān milā.ī na ga.ī

ham se pūchhā na gayā nām-o-nishāñ bhī un kā

justujū kī koī tamhīd uThā.ī na ga.ī

dil ko thā hausla-e-arz-e-tamannā so unheñ

sarguzasht-e-shab-e-hijrāñ bhī sunā.ī na ga.ī

ġham-e-dūrī ne kashākash to bahut kī lekin

yaad un kī dil-e-hasrat se bhulā.ī na ga.ī

dil mein kya kya hawas-e-did baDhai na gai

ru-ba-ru un ke magar aankh uThai na gai

hum raza shewa hain tawil-e-sitam KHud kar len

kya hua un se agar baat banai na gai

ye bhi aadab-e-mohabbat ne gawara na kiya

un ki taswir bhi aankhon se lagai na gai

aah wo aankh jo har samt rahi saiqa-pash

wo jo mujh se kisi unwan milai na gai

hum se puchha na gaya nam-o-nishan bhi un ka

justuju ki koi tamhid uThai na gai

dil ko tha hausla-e-arz-e-tamanna so unhen

sarguzasht-e-shab-e-hijran bhi sunai na gai

gham-e-duri ne kashakash to bahut ki lekin

yaad un ki dil-e-hasrat se bhulai na gai