diye usne auron ko saghar pe saghar

diye us ne auroñ ko sāġhar pe sāġhar

chubho.e mire dil meñ nashtar pe nashtar

marīz-e-mohabbat kī hai ab ye hālat

ki aate haiñ har vaqt chakkar pe chakkar

mirī saḳht jaanī ġhazab rañg laa.ī

hue kund qātil ke ḳhanjar pe ḳhanjar

karam hai ye saaqī kī dariyā-dilī kā

mile mujh ko bhar-bhar ke sāġhar pe sāġhar

chaḌhāte haiñ teyorī dikhāte haiñ āñkheñ

chubhote haiñ dil meñ vo nashtar pe nashtar

tirī justujū meñ mah-o-mehr donoñ

lagāte haiñ din raat chakkar pe chakkar

muqābil huā un kī chitvan se jab dil

paḌe tiir par tiir ḳhanjar pe ḳhanjar

nigāhoñ ne dil meñ chubhoī haiñ chhuriyāñ

adāoñ ne maare haiñ ḳhanjar pe ḳhanjar

na sarkā sar us dar se 'āfāq' hargiz

lagā kar use laakh Thokar pe Thokar

diye us ne auron ko saghar pe saghar

chubhoe mere dil mein nashtar pe nashtar

mariz-e-mohabbat ki hai ab ye haalat

ki aate hain har waqt chakkar pe chakkar

meri saKHt jaani ghazab rang lai

hue kund qatil ke KHanjar pe KHanjar

karam hai ye saqi ki dariya-dili ka

mile mujh ko bhar-bhar ke saghar pe saghar

chaDhate hain teyori dikhate hain aankhen

chubhote hain dil mein wo nashtar pe nashtar

teri justuju mein mah-o-mehr donon

lagate hain din raat chakkar pe chakkar

muqabil hua un ki chitwan se jab dil

paDe tir par tir KHanjar pe KHanjar

nigahon ne dil mein chubhoi hain chhuriyan

adaon ne mare hain KHanjar pe KHanjar

na sarka sar us dar se 'afaq' hargiz

laga kar use lakh Thokar pe Thokar