donon jaanib agar aarzu wasl ki koi tufan uThae to main kya karun

donoñ jānib agar aarzū vasl kī koī tūfāñ uThā.e to maiñ kyā karūñ

ishq unheñ gudgudā.e to vo kyā kareñ husn mujh ko bulā.e to maiñ kyā karūñ

jāntā huuñ ye ulfat ik āzār hai dil lagā.e vo jo jaañ se bezār hai

merī nazroñ meñ dil meñ samā kar koī apnī nagrī basā.e to maiñ kyā karūñ

chāhtā thā maiñ ka.aba meñ jā kar rahūñ rāt-o-din bāb-e-rahmat pe sajde karūñ

jism meñ ruuh meñ har rag-o-pai meñ vo ḳhud hī aa kar samā.e to maiñ kyā karūñ

vā.izā baat tū ne pate kī kahī laḌkhaḌāyā vahī duḳht-e-raz jis ne pī

mast nazreñ uThā kar sar-e-bazm vo jām-e-ulfat pilā.e to maiñ kyā karūñ

dīn-o-īmāñ kyā aur kyā hai dharm khol diyā ab to nām-e-ḳhudā ne bharam

chashm-e-murshid ne kī aisī jādūgarī kuchh bhī mujh ko na bhaa.e to maiñ kyā karūñ

sar jhukā duuñ yahāñ tū ne sach hī kahā ye haiñ ulfat ke ādāv-o-rasm-e-vafā

dekh kar rū-e-jānāñ magar nāsehā hosh mujh ko na aa.e to maiñ kyā karūñ

mil gayā raah meñ mujh ko jab vo sanam laakh dil ko sambhālā kiyā zabt-e-ġham

dil meñ hasrat liye chand aañsū magar daf.atan muskurā.e to maiñ kyā karūñ

aap haiñ ibtidā aap haiñ intihā ai vasī-e-nabī ai alī-murtazā

kufr hai jāntā huuñ ye kahnā magar jab yaqīñ dil ko aa.e to maiñ kyā karūñ

kis ko sajde karūñ kis kī puujā karūñ apne hī naam kī kyuuñ na maalā japūñ

manzil-e-ishq par aa ke jab aadmī aks apnā hī paa.e to maiñ kyā karūñ

ilm aur fazl ke dīn-o-īmān ke aql par merī 'kāvish' the parde paḌe

saare parde uThā kar koī ab mujhe apnā jalva dikhā.e to maiñ kyā karūñ

donon jaanib agar aarzu wasl ki koi tufan uThae to main kya karun

ishq unhen gudgudae to wo kya karen husn mujh ko bulae to main kya karun

jaanta hun ye ulfat ek aazar hai dil lagae wo jo jaan se bezar hai

meri nazron mein dil mein sama kar koi apnī nagri basae to main kya karun

chahta tha main kaba mein ja kar rahun raat-o-din bab-e-rahmat pe sajde karun

jism mein ruh mein har rag-o-pai mein wo KHud hi aa kar samae to main kya karun

waiza baat tu ne pate ki kahi laDkhaDaya wahi duKHt-e-raz jis ne pi

mast nazren uTha kar sar-e-bazm wo jam-e-ulfat pilae to main kya karun

din-o-iman kya aur kya hai dharm khol diya ab to nam-e-KHuda ne bharam

chashm-e-murshid ne ki aisi jadugari kuchh bhi mujh ko na bhae to main kya karun

sar jhuka dun yahan tu ne sach hi kaha ye hain ulfat ke aadaw-o-rasm-e-wafa

dekh kar ru-e-jaanan magar naseha hosh mujh ko na aae to main kya karun

mil gaya rah mein mujh ko jab wo sanam lakh dil ko sambhaala kiya zabt-e-gham

dil mein hasrat liye chand aansu magar dafatan muskurae to main kya karun

aap hain ibtida aap hain intiha ai wasi-e-nabi ai ali-murtaza

kufr hai jaanta hun ye kahna magar jab yaqin dil ko aae to main kya karun

kis ko sajde karun kis ki puja karun apne hi nam ki kyun na mala japun

manzil-e-ishq par aa ke jab aadmi aks apna hi pae to main kya karun

ilm aur fazl ke din-o-iman ke aql par meri 'kawish' the parde paDe

sare parde uTha kar koi ab mujhe apna jalwa dikhae to main kya karun