دونوں جانب اگر آرزو وصل کی کوئی طوفاں اٹھائے تو میں کیا کروں

دونوں جانب اگر آرزو وصل کی کوئی طوفاں اٹھائے تو میں کیا کروں

عشق انہیں گدگدائے تو وہ کیا کریں حسن مجھ کو بلائے تو میں کیا کروں

جانتا ہوں یہ الفت اک آزار ہے دل لگائے وہ جو جاں سے بیزار ہے

میری نظروں میں دل میں سما کر کوئی اپنی نگری بسائے تو میں کیا کروں

چاہتا تھا میں کعبہ میں جا کر رہوں رات و دن باب رحمت پہ سجدے کروں

جسم میں روح میں ہر رگ و پے میں وہ خود ہی آ کر سمائے تو میں کیا کروں

واعظا بات تو نے پتے کی کہی لڑکھڑایا وہی دخت رز جس نے پی

مست نظریں اٹھا کر سر بزم وہ جام الفت پلائے تو میں کیا کروں

دین و ایماں کیا اور کیا ہے دھرم کھول دیا اب تو نام خدا نے بھرم

چشم مرشد نے کی ایسی جادوگری کچھ بھی مجھ کو نہ بھائے تو میں کیا کروں

سر جھکا دوں یہاں تو نے سچ ہی کہا یہ ہیں الفت کے آداب‌ و رسم وفا

دیکھ کر روئے جاناں مگر ناصحا ہوش مجھ کو نہ آئے تو میں کیا کروں

مل گیا راہ میں مجھ کو جب وہ صنم لاکھ دل کو سنبھالا کیا ضبط غم

دل میں حسرت لئے چند آنسو مگر دفعتاً مسکرائے تو میں کیا کروں

آپ ہیں ابتدا آپ ہیں انتہا اے وصیٔ نبی اے علی مرتضیٰ

کفر ہے جانتا ہوں یہ کہنا مگر جب یقیں دل کو آئے تو میں کیا کروں

کس کو سجدے کروں کس کی پوجا کروں اپنے ہی نام کی کیوں نہ مالا جپوں

منزل عشق پر آ کے جب آدمی عکس اپنا ہی پائے تو میں کیا کروں

علم اور فضل کے دین و ایمان کے عقل پر میری کاوشؔ تھے پردے پڑے

سارے پردے اٹھا کر کوئی اب مجھے اپنا جلوہ دکھائے تو میں کیا کروں