etibar-e-manzil kya zauq-e-justuju hi hai

e'tibār-e-manzil kyā zauq-e-justujū hī hai

kāmyābī-e-dil kyā kaif-e-ārzū hī hai

tark-e-justujū kar ke dil kā mudda.ā paayā

tark-e-justujū lekin faiz-e-justujū hī hai

mai ba-qaid-e-sāġhar hai ham ba-qaid-e-āzādī

kaif-e-soz-e-tanhā.ī sāġhar-o-subū hī hai

aabrū jise kahiye kuchh nahīñ ba-juz pindār

yaañ shikast-e-har pindār apnī aabrū hī hai

tū haqīqat-e-kul hai vahm ġhair-e-bātil hai

balki vahm-e-bātil bhī haq to ye hai tū hī hai

zulf-e-mushkbū kā ġham dil ko vāqif kyuuñ kar le

dil ko jo kare barham zulf-e-mushkbū hī hai

jis jagah nazar Thahre vo hijāb hai us kā

de nazar ko āzādī phir vo rū-ba-rū hī hai

ye fareb-e-taskīñ hai tark-e-ārzū ma.alūm

tark-e-ārzū 'maikash' ye bhī aarzū hī hai

e'tibar-e-manzil kya zauq-e-justuju hi hai

kaamyabi-e-dil kya kaif-e-arzu hi hai

tark-e-justuju kar ke dil ka muddaa paya

tark-e-justuju lekin faiz-e-justuju hi hai

mai ba-qaid-e-saghar hai hum ba-qaid-e-azadi

kaif-e-soz-e-tanhai saghar-o-subu hi hai

aabru jise kahiye kuchh nahin ba-juz pindar

yan shikast-e-har pindar apni aabru hi hai

tu haqiqat-e-kul hai wahm ghair-e-baatil hai

balki wahm-e-baatil bhi haq to ye hai tu hi hai

zulf-e-mushkbu ka gham dil ko waqif kyun kar le

dil ko jo kare barham zulf-e-mushkbu hi hai

jis jagah nazar Thahre wo hijab hai us ka

de nazar ko aazadi phir wo ru-ba-ru hi hai

ye fareb-e-taskin hai tark-e-arzu malum

tark-e-arzu 'maikash' ye bhi aarzu hi hai