ek din wasl se apne mujhe tum shad karo

ek din vasl se apne mujhe tum shaad karo

phir mirī jaan jo kuchh chāho so be-dād karo

gar kisī ġhair ko farmāoge tab jānoge

ve hamīñ haiñ ki bajā lāveñ jo irshād karo

ab to vīrāñ kiye jaate ho tarab-ḳhāna-e-dil

aah kyā jaane kab aa phir use ābād karo

yaad meñ us qad-o-ruḳhsār ke ai ġham-zadagāñ

jā ke Tuk baaġh meñ sair-e-gul-o-shamshād karo

le ke dil chāho ki phir deve vo dilbar ma.alūm

kaise hī naala karo kaisī hī fariyād karo

surma-e-dīda-e-ushshāq hai ye ai ḳhūbāñ

apne kūche se mirī ḳhaak na barbād karo

dekh kar tā.ir-e-dil aap ko bhūlā parvāz

ḳhvāh pāband karo ḳhvāh use āzād karo

aap kī chaah se chāheñ haiñ mujhe sab varna

kaun phir yaad kare tum na agar yaad karo

sham-e-afroḳhta jab bazm meñ dekho yaaro

hāl-e-'bedār'-e-jigar-soḳhta vaañ yaad karo

ek din wasl se apne mujhe tum shad karo

phir meri jaan jo kuchh chaho so be-dad karo

gar kisi ghair ko farmaoge tab jaanoge

we hamin hain ki baja lawen jo irshad karo

ab to viran kiye jate ho tarab-KHana-e-dil

aah kya jaane kab aa phir use aabaad karo

yaad mein us qad-o-ruKHsar ke ai gham-zadagan

ja ke Tuk bagh mein sair-e-gul-o-shamshad karo

le ke dil chaho ki phir dewe wo dilbar malum

kaise hi nala karo kaisi hi fariyaad karo

surma-e-dida-e-ushshaq hai ye ai KHuban

apne kuche se meri KHak na barbaad karo

dekh kar tair-e-dil aap ko bhula parwaz

KHwah paband karo KHwah use aazad karo

aap ki chah se chahen hain mujhe sab warna

kaun phir yaad kare tum na agar yaad karo

sham-e-afroKHta jab bazm mein dekho yaro

haal-e-'bedar'-e-jigar-soKHta wan yaad karo