ab tasawwur mein haram hai na sanam-KHana hai

ab tasavvur meñ haram hai na sanam-ḳhāna hai

maiñ jahāñ par huuñ vahīñ yaar kā kāshāna hai

justujū-e-haram-o-dair se begāna hai

merā dil aap kī tasvīr kā dīvāna hai

ab na kā'be meñ jhukegā na sanam-ḳhāne meñ

merā sar sar nahīñ sañg-e-dar-e-jānāna hai

sab tirī mast nigāhī kā karam hai saaqī

riñd jo bhī yahāñ hosh se begāna hai

tere dar se na uThā huuñ na uThūñgā ai dost

zindagī tere binā ḳhvāb hai afsāna hai

mudda'ā us ke 'alāva nahīñ kuchh aur merā

terā dīvāna huuñ dar pe tere miT jaanā hai

ai 'fanā' kahte haiñ me'arāj-e-'ibādat us ko

mere har sajde kā hāsil dar-e-jānā hai

ab tasawwur mein haram hai na sanam-KHana hai

main jahan par hun wahin yar ka kashana hai

justuju-e-haram-o-dair se begana hai

mera dil aap ki taswir ka diwana hai

ab na ka'be mein jhukega na sanam-KHane mein

mera sar sar nahin sang-e-dar-e-jaanana hai

sab teri mast nigahi ka karam hai saqi

rind jo bhi yahan hosh se begana hai

tere dar se na uTha hun na uThunga ai dost

zindagi tere bina KHwab hai afsana hai

mudda'a us ke 'alawa nahin kuchh aur mera

tera diwana hun dar pe tere miT jaana hai

ai 'fana' kahte hain me'araj-e-'ibaadat us ko

mere har sajde ka hasil dar-e-jaana hai