marna bhi mohabbat mein kisi kaam na aaya

marnā bhī mohabbat meñ kisī kaam na aayā

marne se bhī ai dil tujhe ārām na aayā

ham jaañ se ga.e us ko magar laaj na aa.ī

ham miT ga.e aur yaar kā paiġhām na aayā

rusvā sar-e-bāzār mohabbat meñ hue ham

sad shukr ki un pe koī ilzām na aayā

kyā kyā na sahe ham ne tere hijr meñ sadme

bhūle se kabhī lab pe terā naam na aayā

sairāb kyā sab ko terī mast nazar ne

lekin merī jānib to koī jaam na aayā

naale bhī kiye aah bhī kī dil bhī jalāyā

vo parda-nashīn phir bhī lab-e-bām na aayā

vīrānī merī qabr kī qismat meñ likhī thī

do phuul chaḌhāne sar-e-shām na aayā

sīkhī thī vafā 'ishq meñ us shoḳh ke ḳhātir

lekin na hunar mere kisī kaam na aayā

kyā bhuul ga.e haiñ vo mujhe pūchhnā qāsid

naama koī muddat se mere kaam na aayā

āġhāz to achchhā thā 'fanā' din bhī bhale the

phir raas mujhe 'ishq kā anjām na aayā

marna bhi mohabbat mein kisi kaam na aaya

marne se bhi ai dil tujhe aaram na aaya

hum jaan se gae us ko magar laj na aai

hum miT gae aur yar ka paigham na aaya

ruswa sar-e-bazar mohabbat mein hue hum

sad shukr ki un pe koi ilzam na aaya

kya kya na sahe hum ne tere hijr mein sadme

bhule se kabhi lab pe tera nam na aaya

sairab kya sab ko teri mast nazar ne

lekin meri jaanib to koi jam na aaya

nale bhi kiye aah bhi ki dil bhi jalaya

wo parda-nashin phir bhi lab-e-baam na aaya

virani meri qabr ki qismat mein likhi thi

do phul chaDhane sar-e-sham na aaya

sikhi thi wafa 'ishq mein us shoKH ke KHatir

lekin na hunar mere kisi kaam na aaya

kya bhul gae hain wo mujhe puchhna qasid

nama koi muddat se mere kaam na aaya

aaghaz to achchha tha 'fana' din bhi bhale the

phir ras mujhe 'ishq ka anjam na aaya