meri zaban pe teri mohabbat ki baat hai

merī zabāñ pe terī mohabbat kī baat hai

ye baat mere vāste rāh-e-najāt hai

kaise ḳhayāl-e-yār se dāman bachā.eñ ham

ab to ḳhayāl-e-yār charāġh-e-hayāt hai

tirā jamāl terī tajallī tirā ḳhayāl

donoñ jahāñ meñ merī yahī kā.ināt hai

mirī bisāt kyā hai tire sāmne sanam

qurbān tere husn pe kul kā.ināt hai

batlā.ūñ kyā junūñ hai mirā kis maqām par

jis din se merā yaar ke hāthoñ meñ haath hai

hai aaj mirā sar tiire dar pe jhukā huā

ai dost tire chashm-e-'ināyat kī baat hai

tere alāva kuchh mujhe aatā nahīñ nazar

ab maiñ huuñ tere saath ki tū mere saath hai

tere baġhair zindagī tārīk hai merī

saare jahāñ meñ din hai mire ghar meñ raat hai

tāsīr ulTī dekhī mohabbat kī raah meñ

us rāste meñ jītne vaale ko maat hai

jis kī mujhe talāsh thī ulfat meñ ai 'fanā'

vo mil ga.e haiñ mujh ko muqaddar kī baat hai

meri zaban pe teri mohabbat ki baat hai

ye baat mere waste rah-e-najat hai

kaise KHayal-e-yar se daman bachaen hum

ab to KHayal-e-yar charagh-e-hayat hai

tera jamal teri tajalli tera KHayal

donon jahan mein meri yahi kainat hai

meri bisat kya hai tere samne sanam

qurban tere husn pe kul kainat hai

batlaun kya junun hai mera kis maqam par

jis din se mera yar ke hathon mein hath hai

hai aaj mera sar tere dar pe jhuka hua

ai dost tere chashm-e-'inayat ki baat hai

tere alawa kuchh mujhe aata nahin nazar

ab main hun tere sath ki tu mere sath hai

tere baghair zindagi tarik hai meri

sare jahan mein din hai mere ghar mein raat hai

tasir ulTi dekhi mohabbat ki rah mein

us raste mein jitne wale ko mat hai

jis ki mujhe talash thi ulfat mein ai 'fana'

wo mil gae hain mujh ko muqaddar ki baat hai