میری زباں پہ تیری محبت کی بات ہے

میری زباں پہ تیری محبت کی بات ہے

یہ بات میرے واسطے راہ نجات ہے

کیسے خیال یار سے دامن بچائیں ہم

اب تو خیال یار چراغ‌‌ حیات ہے

ترا جمال تیری تجلی ترا خیال

دونوں جہاں میں میری یہی کائنات ہے

مری بساط کیا ہے ترے سامنے صنم

قربان تیرے حسن پہ کل کائنات ہے

بتلاؤں کیا جنوں ہے مرا کس مقام پر

جس دن سے میرا یار کے ہاتھوں میں ہاتھ ہے

ہے آج مرا سر تیرے در پہ جھکا ہوا

اے دوست ترے چشم عنایت کی بات ہے

تیرے علاوہ کچھ مجھے آتا نہیں نظر

اب میں ہوں تیرے ساتھ کہ تو میرے ساتھ ہے

تیرے بغیر زندگی تاریک ہے میری

سارے جہاں میں دن ہے مرے گھر میں رات ہے

تاثیر الٹی دیکھی محبت کی راہ میں

اس راستے میں جیتنے والے کو مات ہے

جس کی مجھے تلاش تھی الفت میں اے فناؔ

وہ مل گئے ہیں مجھ کو مقدر کی بات ہے