hai tera tasawwur teri lagan dil tujhse lagae baiThe hain

hai terā tasavvur terī lagan dil tujh se lagā.e baiThe haiñ

ik yaad meñ terī jān-e-jahāñ ham ḳhud ko bhulā.e baiThe haiñ

jhuktī hai nazar sajde ke liye hotī hai namāz-e-'ishq adā

me'arāj-e-'ibādat kyā kahiye vo sāmne aa.e baiThe haiñ

nazroñ kā taqāza puurā karo ek baar to jalva dikhlā de

ye ahl-e-junūñ ye dīvāne ummīd lagā.e baiThe haiñ

taslīm-o-razā kī manzil meñ dil jaan to koī chiiz nahīñ

ham terī adāoñ par jānāñ īmān luTā.e baiThe haiñ

dekho to zarā ye bholā-pan us nāz-o-adā ko kyā kahiye

dil le ke hamārā mahfil meñ nazroñ ko chhupā.e baiThe haiñ

us husn pe duniyā martī hai ik ham hī nahīñ shaidā un ke

ma'alūm nahīñ ye kitnoñ ko dīvāna banā.e baiThe haiñ

hastī hai surūr-e-mastī meñ ab hosh kā da.ava kaun kare

vo mast nazar se ham ko 'fanā' mastāna banā.e baiThe haiñ

hai tera tasawwur teri lagan dil tujh se lagae baiThe hain

ek yaad mein teri jaan-e-jahan hum KHud ko bhulae baiThe hain

jhukti hai nazar sajde ke liye hoti hai namaz-e-'ishq ada

me'araj-e-'ibaadat kya kahiye wo samne aae baiThe hain

nazron ka taqaza pura karo ek bar to jalwa dikhla de

ye ahl-e-junun ye diwane ummid lagae baiThe hain

taslim-o-raza ki manzil mein dil jaan to koi chiz nahin

hum teri adaon par jaanan iman luTae baiThe hain

dekho to zara ye bhola-pan us naz-o-ada ko kya kahiye

dil le ke hamara mahfil mein nazron ko chhupae baiThe hain

us husn pe duniya marti hai ek hum hi nahin shaida un ke

ma'alum nahin ye kitnon ko diwana banae baiThe hain

hasti hai surur-e-masti mein ab hosh ka dawa kaun kare

wo mast nazar se hum ko 'fana' mastana banae baiThe hain