tamanna kyun karun dair-o-haram mein sar jhukane ki

tamannā kyuuñ karūñ dair-o-haram meñ sar jhukāne kī

merī āñkhoñ meñ hai tasvīr tere āstāne kī

mujhe bhī kuchh 'atā kar maiñ tere dar kā savālī huuñ

tere lutf-o-karam ne jholiyāñ bhar diiñ zamāne kī

sila paayā hai maiñ ne bāġhbāñ ye apnī ḳhidmat kā

chaman se le chalā huuñ ḳhaak apne āshiyāne kī

hañsī dekhī hai jab se aap ke mā'sūm hoñToñ par

adā achchhī nahīñ lagtī kalī ke muskurāne kī

bahāroñ kā zamāna yaad aa.egā to ro lūñgā

qafas meñ ik yahī sūrat hai ab taskīn paane kī

hazāroñ āstāne aur bhī duniyā meñ haiñ lekin

mujhe hasrat hai tere dar pe qismat āzmāne kī

merī bad-qismatī dekho 'fanā' vo chal diye uTh kar

mujhe fursat milī jab dāstān-e-ġham sunāne kī

tamanna kyun karun dair-o-haram mein sar jhukane ki

meri aankhon mein hai taswir tere aastane ki

mujhe bhi kuchh 'ata kar main tere dar ka sawali hun

tere lutf-o-karam ne jholiyan bhar din zamane ki

sila paya hai main ne baghban ye apni KHidmat ka

chaman se le chala hun KHak apne aashiyane ki

hansi dekhi hai jab se aap ke ma'sum honTon par

ada achchhi nahin lagti kali ke muskurane ki

bahaaron ka zamana yaad aaega to ro lunga

qafas mein ek yahi surat hai ab taskin pane ki

hazaron aastane aur bhi duniya mein hain lekin

mujhe hasrat hai tere dar pe qismat aazmane ki

meri bad-qismati dekho 'fana' wo chal diye uTh kar

mujhe fursat mili jab dastan-e-gham sunane ki