tere karam ki nawazishon se bataun kya mujhko mila hai

tere karam kī navāzishoñ se batā.ūñ kyā mujh ko milā hai

jhukā ke sar tere āstāñ par qasam ḳhudā kī ḳhudā milā hai

ye terī banda-navāziyāñ haiñ ke dard-e-dil kā pata milā hai

tujhe pukārā jahāñ bhī maiñ ne vahīñ mujhe aasrā milā hai

banā hai koī haram kā shaidā koī sar-e-but-kada chalā hai

mujhe hai naaz apnī bandagī par mujhe terā naqsh-e-pā milā hai

maiñ kaise chhoḌūñ terī galī ko terī galī merī zindagī hai

terī galī meñ to mere dilbar mujhe merā mudda'ā milā hai

faqīr tum ko rahe mubārak vo bādshāhoñ ke āstāne

jo mirī mushkil ko Taal degā mujhe vo mushkil-kushā milā hai

ye āstāñ un kā āstāñ hai yahāñ se hastī miTā ke uThnā

yahāñ pe bantī hai sab kī qismat yahīñ se har mudda'ā milā hai

'fanā' miTī zindagī kī uljhan qarīb aane lagī hai manzil

amān-e-rahbar kī rahbarī se mujhe nayā rāsta milā hai

tere karam ki nawazishon se bataun kya mujh ko mila hai

jhuka ke sar tere aastan par qasam KHuda ki KHuda mila hai

ye teri banda-nawaziyan hain ke dard-e-dil ka pata mila hai

tujhe pukara jahan bhi main ne wahin mujhe aasra mila hai

bana hai koi haram ka shaida koi sar-e-but-kada chala hai

mujhe hai naz apni bandagi par mujhe tera naqsh-e-pa mila hai

main kaise chhoDun teri gali ko teri gali meri zindagi hai

teri gali mein to mere dilbar mujhe mera mudda'a mila hai

faqir tum ko rahe mubarak wo baadshahon ke aastane

jo meri mushkil ko Tal dega mujhe wo mushkil-kusha mila hai

ye aastan un ka aastan hai yahan se hasti miTa ke uThna

yahan pe banti hai sab ki qismat yahin se har mudda'a mila hai

'fana' miTi zindagi ki uljhan qarib aane lagi hai manzil

aman-e-rahbar ki rahbari se mujhe naya rasta mila hai