duniya-e-tasawwur hum aabaad nahin karte

duniyā-e-tasavvur ham ābād nahīñ karte

yaad aate ho tum ḳhud hī ham yaad nahīñ karte

vo jaur-e-musalsal se baaz aa to ga.e lekin

bedād ye kyā kam hai bedād nahīñ karte

sāhil ke tamāshā.ī har Dūbne vaale par

afsos to karte haiñ imdād nahīñ karte

kuchh dard kī shiddat hai kuchh pās-e-mohabbat hai

ham aah to karte haiñ fariyād nahīñ karte

sahrā se bahāroñ ko le aa.e chaman vaale

aur apne gulistāñ ko ābād nahīñ karte

ham maslahatan apnā afsāna bhulā baiThe

kuchh yaad nahīñ aatā kuchh yaad nahīñ karte

āzād kiyā ḳhud ko zindāñ se asīroñ ne

zehnoñ ko ġhulāmī se āzād nahīñ karte

shāyad ki yahī aañsū kaam aa.eñ mohabbat meñ

ham apnī matā-e-ġham barbād nahīñ karte

duniya-e-tasawwur hum aabaad nahin karte

yaad aate ho tum KHud hi hum yaad nahin karte

wo jaur-e-musalsal se baz aa to gae lekin

bedad ye kya kam hai bedad nahin karte

sahil ke tamashai har Dubne wale par

afsos to karte hain imdad nahin karte

kuchh dard ki shiddat hai kuchh pas-e-mohabbat hai

hum aah to karte hain fariyaad nahin karte

sahra se bahaaron ko le aae chaman wale

aur apne gulistan ko aabaad nahin karte

hum maslahatan apna afsana bhula baiThe

kuchh yaad nahin aata kuchh yaad nahin karte

aazad kiya KHud ko zindan se asiron ne

zehnon ko ghulami se aazad nahin karte

shayad ki yahī aansu kaam aaen mohabbat mein

hum apni mata-e-gham barbaad nahin karte