دنیائے تصور ہم آباد نہیں کرتے

دنیائے تصور ہم آباد نہیں کرتے

یاد آتے ہو تم خود ہی ہم یاد نہیں کرتے

وہ جور مسلسل سے باز آ تو گئے لیکن

بیداد یہ کیا کم ہے بیداد نہیں کرتے

ساحل کے تماشائی ہر ڈوبنے والے پر

افسوس تو کرتے ہیں امداد نہیں کرتے

کچھ درد کی شدت ہے کچھ پاس محبت ہے

ہم آہ تو کرتے ہیں فریاد نہیں کرتے

صحرا سے بہاروں کو لے آئے چمن والے

اور اپنے گلستاں کو آباد نہیں کرتے

ہم مصلحتاً اپنا افسانہ بھلا بیٹھے

کچھ یاد نہیں آتا کچھ یاد نہیں کرتے

آزاد کیا خود کو زنداں سے اسیروں نے

ذہنوں کو غلامی سے آزاد نہیں کرتے

شاید کہ یہی آنسو کام آئیں محبت میں

ہم اپنی متاع غم برباد نہیں کرتے